बालदिनानिमित्त मनपा विद्यार्थ्यांची विमानाने ISRO सहल!आयुक्त जी. श्रीकांत यांनी स्वतः मुंबईपर्यंत विद्यार्थ्यांसोबत केला प्रवास

महाराष्ट्र वाणी न्युज

छत्रपती संभाजीनगर( औरंगाबाद) दि १४ :- महानगरपालिकेचे आयुक्त तथा प्रशासक जी. श्रीकांत यांच्या अभिनव संकल्पनेतून मनपा शाळांमध्ये आयोजित “स्मार्ट स्टुडंट परीक्षा” घेण्यात आली होती. या परीक्षेतून निवडण्यात आलेल्या टॉप 10 विद्यार्थ्यांना प्रतिष्ठित ISRO – विक्रम साराभाई स्पेस सेंटर, तिरुवनंतपुरम (केरळ) येथे शैक्षणिक सहलीची मौल्यवान संधी देण्यात आली आहे.

मूळ नियोजनानुसार विद्यार्थ्यांची ISRO भेट दिनांक 17 नोव्हेंबर रोजी होती. मात्र बालदिनाचे औचित्य साधून, आयुक्त मा. जी. श्रीकांत यांनी विद्यार्थ्यांना विमानाद्वारे थेट केरळला नेण्याचे विशेष निर्देश दिले. त्यांच्या सूचनेनुसार आज मनपा शाळांतील विद्यार्थी प्रथमच विमान प्रवासाचा आनंद घेत केरळ येथे पोहोचले.

यातील विशेष ठळक बाब म्हणजे स्वतः आयुक्त जी. श्रीकांत यांनी विद्यार्थ्यांसोबत मुंबईपर्यंत विमानाने प्रवास केला. आयुक्तांसोबत प्रवासाची संधी मिळाल्याने विद्यार्थी अतिशय आनंदित व उत्साहित झाले. अनेक विद्यार्थी प्रथमच विमानात बसत असल्याने ही सहल त्यांच्या आयुष्यातील अविस्मरणीय अनुभव ठरली.

विद्यार्थी 17 नोव्हेंबर रोजी विक्रम साराभाई स्पेस सेंटरला भेट देऊन रॉकेट प्रक्षेपण पाहणार आहेत. छत्रपती संभाजीनगर महानगरपालिकेच्या विद्यार्थ्यांना ISRO केंद्र प्रत्यक्ष पाहण्याची अशी संधी महानगरपालिकेच्या इतिहासात प्रथमच लाभत आहे.

या शैक्षणिक सहलीसोबत विद्यार्थ्यांच्या सुरक्षिततेची व देखरेखीची काळजी घेण्यासाठी अंकुश पांढरे (उपआयुक्त व शिक्षण विभाग प्रमुख), ज्ञानदेव सांगळे (कार्यक्रम अधिकारी), किरण तबडे, मंगेश जाधव, उमा पाटील आणि सविता बांबर्डे (शिक्षक) हे मार्गदर्शक म्हणून उपस्थित आहेत.