अजित पवार गटाचे आमदार संग्राम जगताप अडचणीत; धार्मिक भावना दुखावल्याचा आरोप — अकोला न्यायालयात फौजदारी खटला दाखल!

महाराष्ट्र वाणी न्युज 

अकोला, दि. ८ नोव्हेंबर :- अहिल्या नगरचे आमदार आणि राष्ट्रवादी काँग्रेस (अजित पवार गट) चे नेते संग्राम अरुण जगताप यांच्या विरोधात अकोला मुख्य न्यायिक दंडाधिकारी न्यायालयात फौजदारी खटला दाखल करण्यात आला आहे. सोलापूरमध्ये आयोजित हिंदू आक्रोश मोर्चा सभेत दीपावलीच्या पार्श्वभूमीवर केलेल्या त्यांच्या वादग्रस्त विधानामुळे एका विशिष्ट धर्मीय समाजाच्या धार्मिक भावना दुखावल्याचा आरोप करण्यात आला आहे.

या वक्तव्यामुळे सामाजिक आणि सांप्रदायिक तणाव वाढविण्याचा प्रयत्न झाल्याचे नमूद करून, अकोल्यातील समाजसेवक आणि राष्ट्रवादी काँग्रेस (शरद पवार गट) नेते जावेद जकरिया यांनी या संदर्भात पोलीस ठाणे, जिल्हा पोलीस प्रशासन आणि विधानसभा अध्यक्षांकडे तक्रार केली होती. मात्र, कारवाई न झाल्याने त्यांनी अधि. नजीब शेख यांच्या माध्यमातून थेट न्यायालयात फौजदारी खटला दाखल केला आहे.

न्यायालयाच्या रजिस्ट्रार यांनी या खटल्याची दखल घेत फौजदारी MCA म्हणून नोंद केली असून, पुढील कार्यवाहीसाठी योग्य न्यायालयाकडे वर्ग करण्यात आले आहे.

जकरिया यांनी त्यांच्या याचिकेत आमदार जगताप यांच्यावर भारतीय न्यायसंहिता (BNS) अंतर्गत खालील कलमांनुसार कारवाईची मागणी केली आहे —

कलम १३६(१)(अ)(ब)(क), १३६(२), १९७(अ)(ब)(क)(ड), आणि ३५६(१)(२)(३).

या प्रकरणामुळे राज्याच्या राजकीय वर्तुळात मोठी खळबळ माजली असून, आगामी काळात यावरून अजून वाद पेटण्याची शक्यता वर्तवली जात आहे.

🔹 जकरिया यांच्यावतीने अधि. नजीब शेख पैरवी करत आहेत.

– महाराष्ट्र वाणी | बातम्यांचा आवाज 🔊