अंभई जिल्हा परिषद शाळेच्या गेटसमोर पाणी साचल्याने विद्यार्थ्यांना अडचण

अंभई (ता. सिल्लोड) – दि. १५ महाराष्ट्र वाणी न्युज 

तालुक्यातील अंभई येथील जिल्हा परिषद प्राथमिक शाळेच्या गेटसमोर मोठ्या प्रमाणात पाणी साचत असल्यामुळे शाळेत येणाऱ्या–जाणाऱ्या विद्यार्थ्यांसह शिक्षकवर्गाला मोठ्या गैरसोयीचा सामना करावा लागत आहे. विशेषत: लहान मुलांना शाळेत प्रवेश करताना चिखल व पाण्यातून मार्ग काढावा लागत असून अपघाताचा धोका देखील निर्माण झाला आहे.

स्थानिक नागरिकांनी सांगितले की, शाळेच्या गेटसमोर नाल्याची योग्य व्यवस्था नसल्याने पावसाचे व गटाराचे पाणी थेट रस्त्यावर साचते. परिणामी शाळेच्या मुख्य प्रवेशद्वारासमोर दलदल तयार होते. या पाण्यातून जाणे मुलांसाठी फारच अवघड ठरत असून काहीवेळा चपला निघून जाणे, घसरून पडणे अशा घटना घडत आहेत.

शाळेतील शिक्षकांनीही याबाबत चिंता व्यक्त केली आहे. "आम्हाला रोज विद्यार्थ्यांना सुरक्षितपणे आत आणताना अडचणी येतात. शाळेच्या गेटसमोर पाणी साचल्याने वातावरण अस्वच्छ होत असून आजारपणाचा धोकाही वाढतो," असे शिक्षकांचे म्हणणे आहे.

ग्रामस्थांच्या म्हणण्यानुसार, ही समस्या अनेक दिवसांपासून सुरू असून याकडे ना ग्रामपंचायत लक्ष देत आहे, ना पंचायत समिती प्रशासन. त्यामुळे पालक व नागरिकांमध्ये नाराजीचा सूर उमटला आहे.

नागरिकांनी प्रशासनाकडे तातडीने लक्ष घालून शाळेजवळील पाणी साचण्याची समस्या कायमस्वरूपी दूर करण्याची मागणी केली आहे. नालेसफाई, रस्त्याचे उंचीकरण किंवा जलनिस्सारण यंत्रणा उभारून ही समस्या निकाली काढावी, असे स्थानिकांचे म्हणणे आहे.

👉 प्रश्न असा आहे की, मुलांच्या सुरक्षिततेचा विचार करून ग्रामपंचायत व पंचायत समिती प्रशासन आता तरी तातडीने पावले

् उचलेल का?