🚑 “माणुसकीच्या सेवेला सलाम” — ॲम्ब्युलन्स हेल्प रायडर्सचा नववा वर्धापन दिन उत्साहात साजरा

महाराष्ट्र वाणी

छत्रपती संभाजीनगर(औरंगाबाद) दि २७ :- समाजसेवा, माणुसकी आणि निस्वार्थ मदतीचा ध्यास घेऊन कार्यरत असलेल्या ॲम्ब्युलन्स हेल्प रायडर्स, छत्रपती संभाजीनगर संस्थेचा आज नववा वर्धापन दिन उत्साहात साजरा होत आहे. गेल्या नऊ वर्षांपासून गरजू, रुग्ण आणि संकटग्रस्त नागरिकांसाठी मदतीचा हात बनलेली ही संस्था आज हजारो लोकांच्या विश्वासाचं प्रतीक बनली आहे.

एका छोट्याशा सामाजिक संकल्पनेतून सुरू झालेला हा प्रवास आज मोठ्या मानवसेवी चळवळीत रूपांतरित झाला आहे. विशेषतः कोरोना महामारीच्या काळात स्वतःच्या जीवाची पर्वा न करता रुग्णांना मदत, ॲम्ब्युलन्स सेवा, रक्तदान, औषधांची उपलब्धता आणि आपत्कालीन मदत पुरवून हेल्प रायडर्सने समाजासमोर आदर्श निर्माण केला.

अपघात, वैद्यकीय आणीबाणी किंवा कोणत्याही संकटाच्या वेळी धावून जाणाऱ्या या संस्थेने “माणुसकी हाच खरा धर्म” हे कृतीतून दाखवून दिले आहे. संस्थेतील प्रत्येक स्वयंसेवक हा समाजासाठी प्रेरणादायी ठरत असून, भेदभाव विसरून सेवा देण्याची भावना हेच या परिवाराचं खरं बळ आहे.

प्रशांत भाऊ यांच्या प्रेरणेनंतर २७ मे २०१८ रोजी संदीप शरद कुलकर्णी यांनी सोशल मीडियावरील एका आवाहनातून या उपक्रमाची सुरुवात केली. आज ही चळवळ हजारो हृदयांना जोडणारा विश्वासाचा परिवार बनली आहे.

या यशामागे संस्थेचे सर्व सदस्य, स्वयंसेवक, हितचिंतक आणि दाते यांचे मोठे योगदान असल्याची भावना मुख्य समन्वयक संदीप शरद कुलकर्णी यांनी व्यक्त केली. “जेव्हा कोणीतरी संकटात असतो, तेव्हा मदतीसाठी पुढे होणारा प्रत्येक हेल्प रायडर म्हणजे चालतं-बोलतं मानवतेचं रूप असतं,” असे त्यांनी सांगितले.

मानवतेच्या सेवेसाठी कार्यरत असलेल्या या संस्थेचे कार्य भविष्यातही असेच अखंड सुरू राहो, अशी भावना नागरिकांकडून व्यक्त होत आहे.

✨ माणुसकी जिवंत ठेवणाऱ्या प्रत्येक हेल्प रायडरला सलाम…!