🟢 १७६९ रुग्णांना १४.२५ कोटींचा दिलासा; फडणवीसांच्या पुढाकाराने आरोग्यसेवेला नवी गती!

महाराष्ट्र वाणी

छत्रपती संभाजीनगर(औरंगाबाद), दि. १० :- शासनाच्या विविध योजनांमधून मदत न मिळालेल्या गरजू व पात्र रुग्णांसाठी मुख्यमंत्री वैद्यकीय सहाय्यता निधी खऱ्या अर्थाने ‘आधार’ ठरत आहे. जिल्ह्यात आर्थिक वर्षात तब्बल १७६९ रुग्णांना सुमारे १४ कोटी २५ लाख रुपयांची वैद्यकीय मदत वितरित करण्यात आली आहे.

मुख्यमंत्री Devendra Fadnavis यांच्या दूरदृष्टीतून जिल्हा कक्षाची स्थापना, पेपरलेस अर्ज प्रक्रिया आणि अर्जांच्या तातडीने निपटाऱ्यासारखे सकारात्मक बदल करण्यात आले आहेत. यासोबतच सामंजस्य करार आणि क्राउड फंडिंगच्या माध्यमातून विविध रुग्णालये, धर्मादाय संस्था आणि दात्यांचे सहकार्यही लाभत आहे.

या सुधारित कार्यपद्धतीमुळे मदत वितरणात पारदर्शकता वाढली असून प्रक्रिया अधिक वेगवान झाली आहे. परिणामी, अधिकाधिक गरजू रुग्णांना वेळेत आर्थिक सहाय्य मिळत आहे.

२० गंभीर आजारांसाठी मदत

कॉक्लियर इम्प्लांट (२ ते ६ वर्षे वयोगट), हृदय, यकृत, किडनी, फुफ्फुस, बोन मॅरो प्रत्यारोपण, हिप व गुडघा रिप्लेसमेंट, कर्करोग शस्त्रक्रिया, डायालिसिस, मेंदूचे आजार, नवजात शिशूंचे आजार, बर्न व विद्युत अपघात अशा एकूण २० गंभीर आजारांसाठी या निधीतून अर्थसाहाय्य दिले जाते.

बालकांच्या कर्करोग उपचारासाठी करार

मुख्यमंत्री सहाय्यता निधी कक्ष, बीपीसीएल फाऊंडेशन आणि Tata Memorial Centre यांच्यात नुकताच सामंजस्य करार करण्यात आला आहे. या करारामुळे CSR अंतर्गत विशेष निधी उपलब्ध होऊन गरजू बालकांना गुणवत्तापूर्ण कर्करोग उपचार मिळण्याचा मार्ग मोकळा झाला आहे.

राज्यभरातील मदतीचा आकडा

१ एप्रिल २०२५ ते ३१ मार्च २०२६ या कालावधीत राज्यातील ४०,७७६ रुग्णांना ३३३ कोटींहून अधिक मदत देण्यात आली आहे. त्यात छत्रपती संभाजीनगर जिल्ह्याचा मोठा वाटा आहे.

गरजू रुग्णांनी योजनेचा लाभ घेण्यासाठी १८०० १२३ २२११ या टोल फ्री क्रमांकावर संपर्क साधावा, असे आवाहन कक्ष प्रमुख रामेश्वर नाईक यांनी केले आहे.

👉 आरोग्यसेवेतील ही मदत अनेक कुटुंबांसाठी नवजीवन ठरत असून, शासनाच्या या उपक्रमाला सर्वसामान्यांचा वाढता प्रतिसाद मिळत आहे.