“स्वस्थ नारी – सशक्त परिवार” अभियान अंतर्गत ग्रामीण पोलीस दलात महिला आरोग्य तपासणी शिबिराचे आयोजन

महाराष्ट्र वाणी न्युज 

छत्रपती संभाजीनगर( औरंगाबाद) दि १ :- पोलीस अधीक्षक कार्यालय, छत्रपती संभाजीनगर ग्रामीण यांच्या वतीने “स्वस्थ नारी – सशक्त परिवार” अभियान अंतर्गत महिला पोलीस अधिकारी, अंमलदार व कर्मचारी यांच्यासाठी वैद्यकीय तपासणी शिबिराचे आयोजन करण्यात आले. हे शिबिर शासकीय वैद्यकीय महाविद्यालय व कर्करोग रुग्णालय यांच्या संयुक्त विद्यमाने कैलासशिल्प सभागृह येथे झाले.

या शिबिरात पोलीस अधीक्षक डॉ. विनयकुमार राठोड, अपर पोलीस अधीक्षक अन्नपुर्णा सिंह, विशेष कार्य अधिकारी डॉ. अरविंद गायकवाड, कर्करोग तज्ञ डॉ. अर्चना राठोड, डॉ. अनघा वरुडकर, डॉ. ऋषिकेश खांडेलकर, डॉ. भक्ती कल्याणकर यांच्यासह पोलीस कर्मचारी व कुटुंबीय मोठ्या संख्येने उपस्थित होते.

यावेळी पोलीस अधीक्षक डॉ. राठोड यांनी व्यस्त व तणावपूर्ण जीवनशैलीमुळे पोलीस कर्मचाऱ्यांच्या आरोग्याकडे दुर्लक्ष होत असल्याचे सांगून, नियमित तपासणीचे महत्त्व अधोरेखित केले. त्यांनी विशेषत: महिलांनी स्वतःच्या आरोग्याकडे दुर्लक्ष न करता तपासणी ही कुटुंबासाठीची गुंतवणूक समजावी, असे आवाहन केले.

कर्करोग तज्ञांनी या वेळी मौल्यवान मार्गदर्शन केले. डॉ. गायकवाड यांनी तंबाखू, गुटखा व मद्यपानामुळे वाढणाऱ्या ओरल कॅन्सरबाबत चेतावणी दिली. तर डॉ. अर्चना राठोड यांनी स्तन व गर्भाशयाच्या कर्करोगाचे वाढते प्रमाण, त्याची कारणे तसेच ‘पॅप स्मिअर टेस्ट’ व एचपीव्ही लसीकरणाचे महत्त्व स्पष्ट केले.

या शिबिरात जिल्हा पोलीस दलातील 118 महिला पोलीस अंमलदार व कुटुंबीयांची रक्ततपासणी, पॅप स्मिअर टेस्ट करण्यात आली. तसेच स्वस्तन परिक्षणाबाबत महिलांना प्रशिक्षणही देण्यात आले.

कार्यक्रमाचे आभार अपर पोलीस अधीक्षक अन्नपुर्णा सिंह यांनी मान्यवर व उपस्थितांचे मानले. या उपक्रमाचे यशस्वी आयोजन पोलीस उपअधीक्षक गौतम पातारे, पोलीस निरीक्षक प्रशांत महाजन, अण्णासाहेब वाघमोडे, स.पो.नि. सिद्धेश्वर गोरे, सरला गाडेकर, प्रदीप भिवसने आदींच्या मार्गदर्शनाखाली झाले. सूत्रसंचालन परमेश्वर आढे यांनी केले.

👉 आरोग्य तपासणी व जनजागृतीमुळे महिला पोलिसांना नियमित वैद्यकीय देखरेखीचे महत्त्व अधोरेखित झाले आहे.