वंचितांच्या न्यायासाठी लढा अधिक तीव्र करण्याचा निर्धार राष्ट्रवादी काँग्रेस (शरदचंद्र पवार) सामाजिक न्याय विभागाची मराठवाडा विभागीय बैठक उत्साहात संपन्न

महाराष्ट्र वाणी

छत्रपती संभाजीनगर(औरंगाबाद) दि ११ :- राष्ट्रवादी काँग्रेस पक्ष (शरदचंद्र पवार) सामाजिक न्याय विभागाची मराठवाडा विभागीय बैठक राष्ट्रवादी भवन, छत्रपती संभाजीनगर येथे उत्साहपूर्ण वातावरणात पार पडली. सामाजिक न्याय, वंचित घटकांचे प्रश्न आणि संघटनात्मक बांधणी यांसंदर्भात या बैठकीत सविस्तर चर्चा करण्यात आली.

बैठकीस सामाजिक न्याय विभागाचे प्रदेशाध्यक्ष पंडित कांबळे साहेब प्रमुख उपस्थित होते. त्यांच्या मार्गदर्शनाखाली मराठवाड्यातील विविध सामाजिक प्रश्नांवर चर्चा करत पक्षाची भूमिका अधिक प्रभावीपणे जनतेपर्यंत पोहोचविण्याचा निर्धार करण्यात आला.

यावेळी बोलताना पदाधिकाऱ्यांनी समाजातील वंचित, शोषित, दलित, भटक्या-विमुक्त तसेच दुर्लक्षित घटकांच्या हक्कांसाठी राष्ट्रवादी काँग्रेस पक्ष रस्त्यावर उतरून संघर्ष करेल, असा विश्वास व्यक्त केला. आदरणीय शरदचंद्र पवार साहेब यांच्या विचारांवर चालत सामाजिक न्यायासाठीची लढाई अधिक तीव्र करण्याचा निर्धारही बैठकीत व्यक्त करण्यात आला.

बैठकीला जिल्हाध्यक्ष पांडुरंग तांगडे पाटील यांच्यासह सामाजिक न्याय विभागाचे विविध जिल्ह्यांतील पदाधिकारी, कार्यकर्ते आणि महिला प्रतिनिधी मोठ्या संख्येने उपस्थित होते. संघटन मजबूत करण्यासाठी आगामी काळात गावपातळीपर्यंत बैठका घेण्याचा निर्णयही यावेळी घेण्यात आला.

मराठवाड्यातील सामाजिक प्रश्नांवर एकजूट निर्माण करून जनआंदोलन उभारण्याची गरज असल्याचे मत अनेक वक्त्यांनी व्यक्त केले. तसेच बेरोजगारी, शिक्षण, आरक्षण, सामाजिक सुरक्षा योजना आणि मागास घटकांच्या प्रश्नांवर शासनाने ठोस भूमिका घ्यावी, अशी मागणीही करण्यात आली.

“सामाजिक न्यायासाठीची ही लढाई आता अधिक व्यापक होणार असून, वंचितांच्या हक्कांसाठी राष्ट्रवादी काँग्रेस पक्ष मैदानात उतरलेला दिसणार आहे,” असा संदेश या बैठकीतून देण्यात आला.

👉 राजकारणासह सामाजिक घडामोडींच्या ताज्या बातम्यांसाठी ‘महाराष्ट्र वाणी’सोबत जोडलेले रहा!