🔘"लाडकी बहीण" योजनेत ४८०० कोटींचा घोटाळा? सुप्रिया सुळेंचा थेट आरोप; सरकारकडे श्वेतपत्रिकेची मागणी!

महाराष्ट्र वाणी न्युज 

मुंबई दि २९ जुलै :- “आई-वडिलांनंतर सर्वात पवित्र नातं असतं ते बहीण-भावाचं... आणि महाराष्ट्र सरकारने या नात्याचाही अपमान केला आहे”, अशा कठोर शब्दांत खासदार सुप्रिया सुळे यांनी ‘लाडकी बहीण’ योजनेतील घोटाळ्यावर गंभीर प्रश्न उपस्थित केले आहेत. या योजनेत तब्बल ४ हजार ८०० कोटी रुपयांचा गैरव्यवहार झाल्याचा आरोप करत त्यांनी श्वेतपत्रिका जाहीर करण्याची व एसआयटीमार्फत चौकशीची मागणी केली आहे.

सुप्रिया सुळे यांनी पत्रकार परिषदेत सरकारवर केलेल्या आरोपांची ठळक मुद्दे अशी :

🔹 २ कोटी ३८ लाख महिलांना लाभ दिला गेला, पण २६ लाख महिलांना नंतर अपात्र ठरवण्यात आलं — हे नेमकं का आणि कशासाठी?

🔹 १४ हजारांहून अधिक पुरुषांनी ‘लाडकी बहीण’ योजनेचा लाभ कसा काय घेतला?

🔹 डायरेक्ट बेनिफिट ट्रान्सफरचे पैसे पुरुषांच्या खात्यात गेले, हे कसे शक्य?

🔹 आधार, बँक तपशील, ओळखपत्र देऊनही पुरुषांकडून अर्ज कसे मंजूर झाले? नियमांचे उल्लंघन झालं का?

सुळे म्हणाल्या की, लाडकी बहीण योजनेसाठी फॉर्म भरणाऱ्या महिलांकडून पूर्ण माहिती घेतली जाते, मग या प्रक्रियेत घोटाळा झाला कसा? “शेतकऱ्यांच्या आत्महत्या थांबत नाहीत, कर्जमाफीत ढिलाई आहे, आणि सरकार कोट्यवधी रुपये जाहिरातींवर खर्च करतं. ही योजना फक्त प्रचारापुरती आहे का?” असा सवालही त्यांनी उपस्थित केला.

त्याचबरोबर, “मी महिला व बालकल्याण मंत्री आदिती तटकरे यांना या सगळ्याचा जबाबदार धरत नाही. ही योजना सरकारच्या कॅबिनेटने मंजूर केली आहे. त्यामुळे जबाबदारी मुख्यमंत्री देवेंद्र फडणवीस यांची आहे”, असं सुळे यांनी स्पष्ट केलं.

शेवटी, सुळे यांनी इशारा दिला की, “जर राज्य सरकारने सहकार्य केलं नाही, तर हा मुद्दा मी थेट लोकसभेत मांडणार आहे.”

👉 हाच सवाल प्रत्येक बहिणीचा – 'कोण घेतंय जबाबदारी?'