लाडकी बहीण योजनेत लाभ अडकलाय? e-KYC दुरुस्तीची शेवटची संधी 31 मार्चपर्यंत!

महाराष्ट्र वाणी 

छत्रपती संभाजीनगर(औरंगाबाद) दि ६ :- मुख्यमंत्री माझी लाडकी बहीण योजना अंतर्गत काही महिलांना आर्थिक लाभ मिळण्यात अडचणी येत असल्याचे समोर आले आहे. e-KYC प्रक्रियेदरम्यान चुकीचा पर्याय निवडणे किंवा माहिती अचूक न भरल्यामुळे अनेक पात्र लाभार्थ्यांचे अर्ज प्रणालीत अडकले आहेत.

महिला व बालविकास मंत्री अदिती तटकरे यांनी सोशल मीडियावरून माहिती देत सांगितले की, अशा महिलांसाठी शासनाने विशेष दुरुस्तीची संधी उपलब्ध करून दिली आहे.

e-KYC मधील चुका ठरत आहेत अडथळा

योजनेची अंमलबजावणी करताना असे लक्षात आले की, काही महिलांनी e-KYC पूर्ण केली असली तरी चुकीची माहिती भरल्यामुळे त्यांचा अर्ज पडताळणी प्रक्रियेत थांबला आहे. त्यामुळे वेळेत आर्थिक मदत मिळू शकलेली नाही.

विशेषतः ज्या महिलांनी e-KYC करूनही अद्याप लाभ घेतलेला नाही, अशा तक्रारी मोठ्या प्रमाणावर विभागाकडे प्राप्त झाल्या आहेत.

महिलांसाठी पुन्हा दुरुस्तीची संधी

या अडचणी लक्षात घेऊन महिला व बालविकास विभागाने ऑनलाइन पोर्टलवर e-KYC माहिती सुधारण्याची सुविधा पुन्हा सुरू केली आहे. योग्य तपशील अपडेट केल्यानंतर अर्ज पुन्हा पडताळणीसाठी पाठवला जाईल आणि पात्र महिलांना योजनेचा लाभ मिळण्याचा मार्ग मोकळा होणार आहे.

31 मार्च 2026 पर्यंत ऑनलाइन दुरुस्तीची मुदत

विभागाने स्पष्ट केले आहे की, लाभार्थी महिलांना 31 मार्च 2026 पर्यंत ऑनलाइन पद्धतीने आपली e-KYC माहिती दुरुस्त करता येणार आहे.

यामुळे अधिकाधिक पात्र महिलांना योजनेचा लाभ मिळावा हा शासनाचा उद्देश आहे.

महिलांनी ही संधी न दवडता वेळेत आवश्यक दुरुस्ती करून घ्यावी, असे आवाहन करण्यात आले आहे.

लाडकी बहीण योजनेचा लाभ मिळवण्यासाठी वेळेत e-KYC दुरुस्ती करून घ्या आणि ही संधी हातातून जाऊ देऊ नका!