मोटार सायकल चोरी करणाऱ्या तिन अट्टल चोरट्यांना अटक; चार दुचाकी जप्त

महाराष्ट्र वाणी

छत्रपती संभाजीनगर(औरंगाबाद) दि २५ :- शहर गुन्हे शाखेच्या पथकाने मोटार सायकल चोरी करणाऱ्या तिन अट्टल चोरट्यांना अटक करून त्यांच्याकडून तब्बल १ लाख रुपये किमतीच्या चार चोरीच्या दुचाकी जप्त केल्या आहेत. या कारवाईमुळे बेगमपुरा, वेदांतनगर तसेच भोकरदन परिसरातील चार गुन्ह्यांची उकल झाली आहे.

या प्रकरणी Begumpura Police Station येथे गुन्हा क्रमांक 111/2026 कलम 303(2) भा.न्या.सं. अंतर्गत गुन्हा दाखल करण्यात आला होता. फिर्यादी किशोर नामदेव घोटेगावकर (वय 38, रा. विद्युत कॉलनी, बेगमपुरा) यांनी मोटार सायकल चोरीची तक्रार दिली होती.

गुन्हे शाखेचे पथक 24 जून 2026 रोजी पेट्रोलिंग करत असताना गुप्त बातमीदारामार्फत माहिती मिळाली की, छावणी परिसरातील एका मोकळ्या मैदानात काही इसम चोरीच्या मोटार सायकली विक्रीसाठी घेऊन येणार आहेत. माहितीच्या आधारे पथकाने सापळा रचून तिघांना ताब्यात घेतले.

अटक करण्यात आलेल्या आरोपींमध्ये विशाल प्रभु सोनवणे (रा. मलकापूर, ता. भोकरदन, जि. जालना), गिरीष मनोज बेलदार (रा. बेरी बुद्रुक, ता. जामनेर, जि. जळगाव) आणि शशांक संतोष कांबळे (रा. भावसिंगपुरा, छत्रपती संभाजीनगर) यांचा समावेश आहे.

पोलिसांनी आरोपींकडून तीन शाईन मोटार सायकली आणि एक टीव्हीएस ज्युपिटर मोपेड असा एकूण १ लाख रुपयांचा मुद्देमाल जप्त केला आहे. चौकशीदरम्यान आरोपींनी बिबी का मकबरा परिसरातून दोन मोटार सायकली, रेल्वे स्टेशन परिसरातून एक मोपेड आणि भोकरदन येथून एक मोटार सायकल चोरी केल्याची कबुली दिली.

चेसिस आणि इंजिन नंबर तपासल्यानंतर या वाहनांचा संबंध बेगमपुरा, वेदांतनगर आणि भोकरदन पोलीस ठाण्यात दाखल असलेल्या चार गुन्ह्यांशी असल्याचे निष्पन्न झाले.

ही कारवाई पोलीस आयुक्त Pravin Pawar, पोलीस उपायुक्त (गुन्हे) प्रशांत मोहिते आणि सहाय्यक पोलीस आयुक्त अशोक राजपूत यांच्या मार्गदर्शनाखाली करण्यात आली. या मोहिमेत पोलीस निरीक्षक गजानन कल्याणकर, पोलीस उपनिरीक्षक प्रविण वाघ तसेच गुन्हे शाखेच्या पथकाने उल्लेखनीय कामगिरी बजावली.

“गुन्हेगार कितीही चलाख असला तरी कायद्याच्या हातातून सुटू शकत नाही,” अशीच पुन्हा एकदा गुन्हे शाखेने प्रचिती दिली आहे.