“मालेगावातील चिमुकलीला न्याय मिळावा; क्रूरकर्माच्या आरोपीला फाशीची शिक्षा द्यावी” — सुवर्णकार समाजाचे विभागीय आयुक्त व जिल्हाधिकाऱ्यांना निवेदन

महाराष्ट्र वाणी 

छत्रपती संभाजीनगर( औरंगाबाद) दि २० :- मालेगाव तालुक्यातील डोंगराळे गावात घडलेल्या क्रूर, भयंकर आणि मन हेलावून टाकणाऱ्या घटनेच्या निषेधार्थ आज छत्रपती संभाजीनगरातील विभागीय आयुक्त कार्यालय तसेच जिल्हाधिकारी कार्यालय येथे सुवर्णकार समाजाने मोठ्या संख्येने उपस्थित राहून निवेदन सादर केले.

सोनार पंचायत मंदिर ट्रस्ट, सुवर्णकार समाज मंडळ व विठ्ठल-रुख्माई मंदिर ट्रस्ट यांच्या संयुक्त विद्यमाने आज (दि. 20 नोव्हेंबर 2025, गुरुवार) दुपारी विभागीय आयुक्त कार्यालयातील सामान्य प्रशासन विभागात तहसिलदार श्री. भदाणे यांची भेट घेऊन सविस्तर चर्चा करण्यात आली व आरोपीला लवकरात लवकर फाशीची शिक्षा व्हावी याबाबतचे निवेदन देण्यात आले.

यानंतर जिल्हाधिकारी कार्यालयात निवासी उपजिल्हाधिकारी तथा अप्पर जिल्हादंडाधिकारी श्री. जनार्धन विधाते साहेबांची भेट घेऊन समाजाच्या वतीने तीव्र निषेध नोंदवण्यात आला आणि चिमुकलीला न्याय मिळावा या प्रमुख मागणीचे निवेदन सादर करण्यात आले.

घटनेचा तीव्र संताप व्यक्त करत सर्व शाखीय सुवर्णकार समाजातील महिला व पुरुष मोठ्या संख्येने उपस्थित राहिले. त्यांनी आरोपीला कठोरात कठोर अशी फाशीची शिक्षा व्हावी, तसेच प्रकरणात लवकर न्याय मिळावा अशी मागणी अधिकाऱ्यांकडे केली.