"मानसिक समाधानच खरी श्रीमंती; सदाफ शेख यांचे विद्यापीठ कर्मचाऱ्यांना मार्गदर्शन"

महाराष्ट्र वाणी 

छत्रपती संभाजीनगर( औरंगाबाद) दि २० :- "पैसा, प्रतिष्ठा महत्त्वाची पण मानसिक समाधानाशिवाय कोणतेही यश पूर्ण होत नाही," असे प्रतिपादन माइंड ट्रेनर सदमती सदाफ शेख यांनी केले. डॉ. बाबासाहेब आंबेडकर मराठवाडा विद्यापीठाच्या अंतर्गत गुणवत्ता हमी कक्षातर्फे पीएम उषा प्रकल्पांतर्गत विद्यापीठातील कर्मचाऱ्यांसाठी दिनांक 19 नोव्हेंबर रोजी आयोजित विशेष कार्यशाळेत त्या बोलत होत्या.

'इमोशनल अँड स्ट्रेस मॅनेजमेंट' या विषयावर सदाफ शेख यांनी पॉवर पॉइंट प्रेझेंटेशनद्वारे सविस्तर मार्गदर्शन केले. अलीकडच्या काळात तंत्रज्ञानामुळे सुविधा वाढल्या असल्या तरी मानसिक तणावाचे प्रमाण देखील तितकेच वाढले असल्याचे त्यांनी सांगितले. योग, मॉर्निंग वॉक, वाचन, मनन–चिंतन यांसारख्या गोष्टी जीवनात आणल्यास तणाव घटतो, असे त्यांनी स्पष्ट केले.

प्रत्येक व्यक्ती खास वैशिष्ट्यांसह जन्माला येते. त्यामुळे "आपणच आपल्या जीवनाचे नायक आहोत" हे समजून काम करण्याचा संदेश त्यांनी कर्मचाऱ्यांना दिला. फक्त तंत्रज्ञान नव्हे तर 'लाईफ स्किल्स' जाणून घेणेही अत्यावश्यक असल्याचे त्या म्हणाल्या.

कार्यक्रमाच्या अध्यक्षस्थानी कुलसचिव डॉ. प्रशांत अमृतकर होते. यावेळी वित्त व लेखाधिकारी सविता जंपवाड, समन्वयक डॉ. जी. डी. खेडकर, डॉ. कैलास पाथ्रीकर, उपकुलसचिव डॉ. संजय कवडे आदी मान्यवर उपस्थित होते.

डॉ. गुलाब खेडकर यांनी प्रास्ताविक केले. डॉ. संजय शिंदे यांनी सूत्रसंचालन केले, तर रोहन गावडे यांनी आभार मानले.

मुख्य इमारतीतील महात्मा फुले सभागृहात सकाळी ११ वाजता झालेल्या या कार्यशाळेस २२० कर्मचारी उपस्थित होते.