मराठवाड्यात दुष्काळ जाहीर करा, SDPI चा प्रशासनाला अल्टिमेटम; आठवडाभरात निर्णय न झाल्यास तीव्र आंदोलनाचा इशारा

छत्रपती संभाजीनगर (औरंगाबाद), दि. २१ : मराठवाड्यात पावसाची अनियमितता, शेतीचे नुकसान, पाणीसाठ्याची स्थिती आणि ग्रामीण भागातील पिण्याच्या पाण्याचा प्रश्न गंभीर होत असताना तातडीने दुष्काळ जाहीर करावा, अशी मागणी सोशल डेमोक्रॅटिक पार्टी ऑफ इंडिया (SDPI), औरंगाबादच्या वतीने करण्यात आली आहे. यासंदर्भात SDPIच्या प्रतिनिधी मंडळाने विभागीय आयुक्तांना निवेदन देत एका आठवड्याच्या आत दुष्काळ जाहीर करण्याची मागणी केली आहे.

पावसाच्या कमतरतेमुळे अनेक भागांतील शेतीची कामे आणि पिकांचे उत्पादन प्रभावित झाले असून शेतकऱ्यांसमोर आर्थिक संकट निर्माण झाले आहे. त्याचबरोबर ग्रामीण भागातील पिण्याचे पाणी, पशुधनासाठी चारा व पाणी तसेच नागरिकांच्या दैनंदिन गरजांवरही परिणाम होत असल्याचे SDPIने निवेदनात नमूद केले आहे.

‘जायकवाडीचे पाणी पिण्यासाठी सुरक्षित ठेवा’

मराठवाड्याच्या भविष्यातील पाणीप्रश्नाचा गांभीर्याने विचार करून जायकवाडी धरणातील उपलब्ध पाणीसाठ्याचे योग्य नियोजन करावे आणि पिण्याच्या पाण्यासाठी आवश्यक साठा सुरक्षित ठेवावा, अशी मागणी SDPIने केली आहे.

बाधित भागांमध्ये तातडीने पिण्याच्या पाण्याची व्यवस्था करावी, पशुधनासाठी चारा व पाण्याची उपलब्धता करून द्यावी आणि दुष्काळी परिस्थितीवर तातडीने उपाययोजना कराव्यात, अशीही मागणी करण्यात आली.

SDPIच्या प्रमुख मागण्या

मराठवाड्यात एका आठवड्याच्या आत दुष्काळ जाहीर करावा.

पिकांचे तातडीने पंचनामे करून नुकसानग्रस्त शेतकऱ्यांना आर्थिक मदत व भरपाई द्यावी.

शेतकऱ्यांना कर्ज व विविध शासकीय योजनांमध्ये आवश्यक सवलती द्याव्यात.

दुष्काळग्रस्त भागात पिण्याच्या पाण्याची तातडीची व कायमस्वरूपी व्यवस्था करावी.

पशुधनासाठी पुरेसा चारा व पाण्याची व्यवस्था करावी.

जायकवाडी धरणातील पाण्याचे योग्य नियोजन करून पिण्याच्या पाण्यासाठी साठा सुरक्षित ठेवावा.

दुष्काळग्रस्त शेतकऱ्यांना शासकीय मदत व पॅकेजचा लाभ पारदर्शकपणे आणि वेळेत मिळेल, याची प्रशासनाने खात्री करावी.

दुष्काळी परिस्थितीचा नियमित आढावा घेण्यासाठी विशेष प्रशासकीय बैठक आयोजित करावी.

“शेतकरी संकटात असताना प्रशासनाने केवळ कागदोपत्री पाहणी न करता प्रत्यक्ष परिस्थितीचा आढावा घेऊन तातडीने निर्णय घेणे आवश्यक आहे. दुष्काळ जाहीर करण्यास विलंब झाल्यास त्याची मोठी किंमत शेतकरी आणि सामान्य नागरिकांना मोजावी लागेल,” असा इशारा SDPIच्या वतीने देण्यात आला.

एका आठवड्याच्या आत दुष्काळ जाहीर करून शेतकरी व नागरिकांच्या मागण्या पूर्ण केल्या नाहीत, तर SDPIच्या वतीने तीव्र आंदोलन छेडण्यात येईल, असा स्पष्ट इशारा प्रतिनिधी मंडळाने प्रशासनाला दिला.

प्रतिनिधी मंडळाची उपस्थिती

समीर शाह इंजिनियर (जिल्हा अध्यक्ष), अलीम शेख (जिल्हा महासचिव), मोहसिन खान (जिल्हा महासचिव), समिउल्लाह काझी (जिल्हा कोषाध्यक्ष), हाफिज अबुझर पटेल (पूर्व विधानसभा अध्यक्ष), आरेफ शाह (जिल्हा सदस्य), उमर मिर्झा (जिल्हा सदस्य), समीर पटेल (फुलंब्री विधानसभा सचिव), रियाझ सौदागर, आरेफ देशमुख, कलीम शेख, शफीउद्दीन शेख, मुबारक चौश यांच्यासह SDPIचे पदाधिकारी व कार्यकर्ते उपस्थित होते.

महाराष्ट्र वाणी | सत्यासाठी निर्भीड | जनतेसाठी समर्पित