💧टंचाईवर तात्काळ उपाययोजना; पाणंद रस्ते पूर्ण करण्याचे आदेश — सिल्लोड-सोयगावमध्ये आ. अब्दुल सत्तार यांची अधिकाऱ्यांना कडक सूचना!

Apr 14, 2026 - 02:38

💧टंचाईवर तात्काळ उपाययोजना; पाणंद रस्ते पूर्ण करण्याचे आदेश — सिल्लोड-सोयगावमध्ये आ. अब्दुल सत्तार यांची अधिकाऱ्यांना कडक सूचना!

✍️ महाराष्ट्र वाणी

सिल्लोड (वा.) दि १३ :- सिल्लोड-सोयगाव विधानसभा मतदारसंघात पाणीटंचाई, चारा टंचाई आणि प्रलंबित विकासकामांच्या पार्श्वभूमीवर महत्त्वाची आढावा बैठक पार पडली. सिल्लोड येथील स्वस्तिक लॉन्स, डोंगरगाव फाटा येथे आमदार अब्दुल सत्तार यांच्या अध्यक्षतेखाली ही बैठक झाली.

बैठकीत मुख्यमंत्री बळीराजा शेत पाणंद रस्ते, मग्रारोहयो अंतर्गत कामे, नैसर्गिक आपत्ती, अनुदान वाटप तसेच विविध सुरू आणि प्रलंबित विकासकामांचा सविस्तर आढावा घेण्यात आला. यावेळी आमदार सत्तार यांनी अधिकाऱ्यांना स्पष्ट निर्देश देत पाणंद रस्त्यांची प्रलंबित कामे तातडीने पूर्ण करण्याचे आदेश दिले.

टंचाईग्रस्त गावांमध्ये त्वरित टँकरद्वारे पाणीपुरवठा सुरू करण्यावर भर देत, विहीर अधिग्रहणाची प्रक्रिया जलद गतीने पूर्ण करण्याच्या सूचना देण्यात आल्या. नागरिकांसोबतच पशुधनासाठीही पाण्याची उपलब्धता सुनिश्चित करण्यावर विशेष लक्ष देण्याचे सांगण्यात आले.

रोजगार हमी योजनेअंतर्गत गावागावात नागरिकांना काम उपलब्ध करून देण्याचे निर्देश देत महसूल विभागाने जप्त केलेला वाळू साठा घरकुल योजनेतील लाभार्थ्यांना शासन नियमांनुसार मोफत देण्याचाही निर्णय यावेळी घेण्यात आला.

“विकासकामांना गती देत नागरिकांच्या मूलभूत गरजांना प्राधान्य देणे हीच आपली बांधिलकी आहे. सर्व यंत्रणांनी समन्वयाने काम करून जनतेच्या अडचणी तातडीने सोडवाव्यात,” असे आवाहन आमदार सत्तार यांनी केले.

या बैठकीस उपविभागीय अधिकारी लतीफ पठाण, सोयगाव तहसीलदार मनीषा मेने, उपविभागीय पोलीस अधिकारी दिनेशकुमार कोल्हे, गटविकास अधिकारी रत्नाकर पगार, पोलीस निरीक्षक शेषराव उदार, उपविभागीय कृषी अधिकारी सुभाष आघाव, सार्वजनिक बांधकाम विभागाचे उपकार्यकारी अभियंता विजयकुमार सोन्ने, जि.प. सार्वजनिक बांधकाम विभागाचे अभियंता दिलीप फुलारी, जलसंपदा विभागाच्या कार्यकारी अभियंता साजिदा बानो शहापुरे, जलसंधारण अधिकारी राजधार दांडगे, जि.प. सिंचन विभागाच्या उपअभियंता रुचिता घोगरे यांच्यासह जिल्हा बँकेचे चेअरमन अर्जुन पा. गाढे, जि.प. सदस्य देविदास पालोदकर, सय्यद नासेर हुसेन, राजू बाबा काळे, देविदास लोखंडे, उपनगराध्यक्ष विठ्ठल सपकाळ, कृउबा समितीचे सभापती विश्वास दाभाडे आदी अधिकारी, पदाधिकारी, शेतकरी व ग्रामस्थ मोठ्या संख्येने उपस्थित होते.

👉 “आता आश्वासन नाही, थेट कृती — सिल्लोड-सोयगावमध्ये विकासाला वेग मिळणार का?”