🌐 ऑनलाईन कर्ज योजनेला सुरुवात: इतर मागासवर्गीय महामंडळाच्या थेट कर्ज पोर्टलचे उद्घाटन मंत्री अतुल सावे यांच्या हस्ते

महाराष्ट्र वाणी न्युज 

मुंबई दि १४ :- महाराष्ट्र राज्य इतर मागासवर्गीय वित्त आणि विकास महामंडळाच्या थेट कर्ज योजनेच्या ऑनलाइन पोर्टलचे उद्घाटन आज मंत्री अतुल सावे यांच्या हस्ते मंत्रालयात संपन्न झाले.

शासनाच्या सेवा वितरण प्रणालीत पारदर्शकता, सुलभता आणि वेग आणण्याच्या दिशेने हा एक महत्त्वपूर्ण टप्पा मानला जात आहे.

यापूर्वी ही योजना ऑफलाइन पद्धतीने राबवली जात होती. मात्र, आता या पोर्टलच्या माध्यमातून राज्यातील इतर मागास प्रवर्गातील अधिकाधिक नागरिकांना थेट लाभ मिळण्याचा मार्ग खुला झाला आहे.

या योजनेअंतर्गत महाराष्ट्रातील १८ ते ५५ वयोगटातील रहिवासी लाभार्थ्यांना व्यवसाय किंवा स्वयंरोजगारासाठी १ लाख रुपयांपर्यंतचे थेट कर्ज दिले जाते.

आजपर्यंत ३९२३ लाभार्थ्यांना सुमारे २१ कोटी रुपयांचे कर्ज वितरित करण्यात आले आहे.

या नवीन ऑनलाइन पोर्टलच्या माध्यमातून लाभ प्रक्रिया आता अधिक वेगवान, पारदर्शक आणि सुलभ होईल.

मंत्र्यांनी सांगितले की, शासनाचा उद्देश सर्वसमावेशक विकास साधण्याचा असून डिजिटल माध्यमातून सामाजिक न्याय विभागाच्या योजना अधिक प्रभावीपणे जनतेपर्यंत पोहोचविण्याचा हा प्रयत्न आहे.

इतर मागास प्रवर्गातील पात्र नागरिकांना विनम्र आवाहन करण्यात आले आहे की, त्यांनी या योजनेचा लाभ घ्यावा आणि msobcfdc.org या संकेतस्थळावर लॉगिन करून ऑनलाईन अर्ज करावा.

🟢 “शासनाच्या योजना आता एका क्लिकवर – पारदर्शकता, सुलभता आणि संधी सर्वांसाठी!”