🔥 ‘उष्णतेचा इशारा’ : १६ ते १८ एप्रिल दरम्यान येलो अलर्ट; उष्माघात टाळण्यासाठी प्रशासनाचे कडक मार्गदर्शन

✍️ महाराष्ट्र वाणी

छत्रपती संभाजीनगर(औरंगाबाद), दि. १५ :- प्रादेशिक हवामान केंद्र, कुलाबा (मुंबई) यांनी १६ ते १८ एप्रिल २०२६ या कालावधीत येलो अलर्ट जारी केला असून, या दरम्यान काही ठिकाणी उष्णतेची लाट येण्याची शक्यता व्यक्त करण्यात आली आहे. वाढत्या तापमानाच्या पार्श्वभूमीवर जिल्हा आपत्ती व्यवस्थापन प्राधिकरणाने नागरिकांसाठी उष्माघातापासून बचावासाठी महत्त्वपूर्ण मार्गदर्शक सूचना जाहीर केल्या आहेत.

निवासी उपजिल्हाधिकारी तथा मुख्य कार्यकारी अधिकारी जनार्दन विधाते यांनी नागरिकांना सतर्क राहण्याचे आवाहन केले आहे.

☀️ उष्माघात टाळण्यासाठी उपाययोजना

उन्हाळ्यात शरीरातील पाण्याचे प्रमाण टिकवणे अत्यंत गरजेचे असल्याने तहान नसली तरी दर अर्ध्या तासाने पाणी पिण्याचा सल्ला देण्यात आला आहे. तसेच ओआरएस, लिंबूपाणी, ताक, लस्सी आणि कैरीचे पन्हे यांसारख्या पेयांचा वापर करावा.

बाहेर पडताना हलके, सैल आणि सुती कपडे वापरावेत. डोक्यावर टोपी, छत्री किंवा ओल्या कापडाने संरक्षण करावे. दुपारी १२ ते ३ या वेळेत बाहेर जाणे टाळावे. कष्टाची कामे सकाळी लवकर पूर्ण करून कामाच्या ठिकाणी विश्रांती घेण्याचेही निर्देश देण्यात आले आहेत.

घर थंड ठेवण्यासाठी पडदे व सनशेडचा वापर करावा. रात्रीच्या वेळी खिडक्या उघड्या ठेवून हवेशीर वातावरण ठेवावे. पाळीव प्राणी व जनावरांना सावलीत ठेवून त्यांना पुरेसे पाणी द्यावे.

⚠️ उष्माघाताची लक्षणे ओळखा

चक्कर येणे, जास्त घाम येणे, डोकेदुखी, अशक्तपणा ही उष्माघाताची लक्षणे असू शकतात. अशी लक्षणे दिसल्यास त्वरित वैद्यकीय सल्ला घ्यावा.

🚫 काय टाळावे?

चहा, कॉफी, मद्य आणि कार्बोनेटेड थंड पेये टाळावीत. उच्च प्रथिनयुक्त व शिळे अन्न खाणे टाळावे. लहान मुले किंवा पाळीव प्राण्यांना बंद गाडीत सोडू नये. तापमान जास्त असताना कष्टाची कामे व स्वयंपाक टाळावा.

जिल्हा प्रशासनाने नागरिकांना आवाहन केले आहे की, अधिक माहितीसाठी राज्य आपत्ती व्यवस्थापन प्राधिकरणाच्या अधिकृत सोशल मीडिया हँडल (@SDMAMaharashtra) तसेच जिल्ह्याच्या संकेतस्थळावरील सूचनांचे पालन करावे.

👉 उन्हाची तीव्रता वाढतेय... काळजी घ्या, सुरक्षित राहा!