🏠 भाडेकरू बनून घरफोडी! सराईत ‘बंटी-बबली’ वाळूज पोलिसांच्या जाळ्यात

महाराष्ट्र वाणी 

वाळुज दि १३ :- घरात भाडेकरू म्हणून राहून विश्वासघात करत घरफोडी करणाऱ्या सराईत गुन्हेगार ‘बंटी-बबली’ जोडीला वाळूज पोलीस स्टेशनने अखेर बेड्या ठोकल्या आहेत. संपूर्ण महाराष्ट्रभर अशाच पद्धतीने चोऱ्या करणारे हे आरोपी पोलिसांसाठी डोकेदुखी ठरत होते.

वाळूज गावातील गणेश वडगावकर यांच्या घरात ऑक्टोबर-नोव्हेंबर २०२4 दरम्यान भाडेकरू म्हणून राहणारे नवनीत मधुकर नाईक (वय 45, रा. भांडुप पश्चिम) व स्मिता नवनीत नाईक (वय 41) यांनी घरातून ५० हजार रुपये रोख व सोन्या-चांदीचे दागिने असा एकूण ६५ हजार रुपयांचा ऐवज लंपास केला होता. याप्रकरणी वाळूज पोलीस स्टेशन येथे गुन्हा रजिस्टर नं. 358/24, बी.एन.एस. 303(2), 3(5) अन्वये गुन्हा दाखल करण्यात आला होता.

या गुन्ह्याचा तपास पोलीस उपनिरीक्षक अजय शितोळे करत असताना आरोपी हे सराईत असून त्यांच्या विरोधात राज्यातील विविध पोलीस ठाण्यांत अनेक गुन्हे दाखल असल्याची माहिती समोर आली. दरम्यान, उरण पोलीस स्टेशनच्या गुन्ह्यात आरोपींना अटक झाल्याची माहिती मिळताच वाळूज पोलिसांनी तळोजा व कल्याण कारागृहातून त्यांना ताब्यात घेतले.

कसून तपासाअंती आरोपींकडून ३ ग्रॅम वजनाची सोन्याची बाळी, चांदीचे तोडे, चांदीचे वाडे व चांदीची चैन असा सुमारे ४० हजार रुपयांचा मुद्देमाल जप्त करण्यात आला आहे. या टोळीने आणखी किती ठिकाणी चोरी केली याचा शोध घेण्यासाठी वाळूज पोलीस अधिक तपास करत आहेत.

ही उल्लेखनीय कामगिरी माननीय पोलीस आयुक्त श्री. प्रवीण पवार, पोलीस उपायुक्त (परिमंडळ-1) श्री. पंकज अतुलकर, सहाय्यक पोलीस आयुक्त छावणी विभाग डॉ. भागीरथी पवार यांच्या मार्गदर्शनाखाली पोलीस निरीक्षक शिवचरण पांढरे यांच्या नेतृत्वात पो.उपनिरीक्षक अजय शितोळे, रमेश राठोड, संदीप वाघ, विजय पिंपळे, सुधाकर पाटील, नितीन धुळे, श्रीकांत सपकाळ, बजरंग धाडगे यांनी यशस्वीरीत्या पार पाडली.

👉 भाडेकरू म्हणून घरात येणाऱ्यांपासून सावध राहा — पोलिसांचा इशारा आणि गुन्हेगारांना कडक संदेश!