ज्येष्ठ पत्रकार स. सो. खंडाळकर यांना पुत्रशोक; ३५ वर्षीय जिग्नेश यांच्या निधनाने हळहळ

छत्रपती संभाजीनगर (औरंगाबाद) दि ११ :- शहरातील ज्येष्ठ आणि अनुभवी पत्रकार स. सो. खंडाळकर यांच्या चिरंजीव जिग्नेश यांचे वयाच्या अवघ्या ३५व्या वर्षी आकस्मिक निधन झाले. या दुःखद घटनेमुळे खंडाळकर कुटुंबावर दुःखाचा डोंगर कोसळला असून, छत्रपती संभाजीनगरच्या पत्रकारिता क्षेत्रात शोकभावना व्यक्त होत आहेत.

स. सो. खंडाळकर यांनी अनेक वर्षे पत्रकारितेच्या माध्यमातून शहरातील विविध घडामोडींना आपल्या लेखणीतून वाचा फोडली. शहराच्या सामाजिक, सांस्कृतिक आणि सार्वजनिक जीवनातील अनेक महत्त्वाच्या घटनांचे वार्तांकन करत त्यांनी पत्रकारितेच्या क्षेत्रात आपले वेगळे स्थान निर्माण केले. अशा ज्येष्ठ पत्रकाराला आपल्या तरुण मुलाच्या निधनाचे दुःख सहन करावे लागत असल्याने त्यांच्या सहकाऱ्यांसह परिचितांमधून हळहळ व्यक्त केली जात आहे.

जिग्नेश यांचा विवाह गेल्याच वर्षी झाला होता. संसाराची नवी सुरुवात करून भविष्यासाठी स्वप्ने रंगवण्याच्या टप्प्यावर त्यांची जीवनयात्रा अचानक संपल्याने कुटुंबीयांवर दुःखाचा मोठा आघात झाला आहे. मुलाच्या निधनाने आई-वडिलांसह संपूर्ण कुटुंबाला बसलेला धक्का शब्दांत व्यक्त करणे कठीण आहे.

या दुःखद घटनेची माहिती समोर आल्यानंतर पत्रकारिता क्षेत्रातील सहकारी आणि शहरातील नागरिकांकडून खंडाळकर कुटुंबीयांप्रति संवेदना व्यक्त केल्या जात आहेत. या कठीण प्रसंगी संपूर्ण पत्रकारिता परिवार त्यांच्या दुःखात सहभागी आहे.

दिवंगत जिग्नेश यांना भावपूर्ण श्रद्धांजली अर्पण करून खंडाळकर कुटुंबीयांना या असह्य दुःखातून सावरण्याचे बळ मिळावे, अशी प्रार्थना व्यक्त केली जात आहे.

त्यांच्या पार्थिवावर आज सायंकाळी सहा वाजता हडको एन ११ जळगाव रोडवरील स्मशानभूमीत अंत्यसंस्कार करण्यात येणार आहेत.

महाराष्ट्र वाणी परिवारातर्फे दिवंगत जिग्नेश यांना भावपूर्ण श्रद्धांजली!