🔥“४५° पार तापमानाचा कहर! उष्णतेच्या लाटेत जीव धोक्यात – ‘महाराष्ट्र वाणी’चे तातडीचे आवाहन”

Apr 27, 2026 - 19:45

महाराष्ट्र वाणी

छत्रपती संभाजीनगर(औरंगाबाद) दि २७ :- राज्यात सध्या उष्णतेची भीषण लाट उसळली असून तापमानाचा पारा ४५ अंश सेल्सिअसच्या पुढे गेला आहे. अंगाची लाही करणाऱ्या या उकाड्यामुळे नागरिक हैराण झाले आहेत. वाढत्या उन्हाच्या तडाख्यामुळे उष्माघाताचा धोका मोठ्या प्रमाणात वाढला असून, काही ठिकाणी मृत्यूच्या दुर्दैवी घटनाही समोर येत आहेत.

या पार्श्वभूमीवर “महाराष्ट्र वाणी” न्यूज चॅनलतर्फे सर्व नागरिकांना, विशेषतः शेतकरी, कामगार बांधव आणि सर्वसामान्य जनतेला सावधगिरी बाळगण्याचे जाहीर आवाहन करण्यात येत आहे.

तापमानाचा वाढता प्रकोप लक्षात घेता ज्येष्ठ नागरिक, लहान मुले आणि आजारी व्यक्तींनी विशेष काळजी घेणे अत्यावश्यक आहे. सकाळी ११ ते दुपारी ४ या वेळेत घराबाहेर पडणे टाळावे. अत्यावश्यक काम असल्यासच बाहेर पडावे आणि सुती कपडे, टोपी, छत्री व गॉगलचा वापर करावा.

उन्हातून आल्यानंतर चक्कर येणे, मळमळ, डोकेदुखी किंवा अशक्तपणा जाणवल्यास विलंब न करता तात्काळ जवळच्या शासकीय रुग्णालयात उपचार घ्यावेत.

उष्माघात हा जीवघेणा ठरू शकतो—म्हणूनच काळजी हीच खरी सुरक्षा आहे.

👉 “सावध राहा, सुरक्षित राहा… कारण तुमचं आरोग्यच तुमचं खरं संपत्ती आहे!”