हातभट्टी धंदेखोराला एमपीडीएखाली कारागृहात! – पोलीस अधीक्षकांची कठोर कारवाई

महाराष्ट्र वाणी न्युज 

छत्रपती संभाजीनगर(औरंगाबाद)दि.२१ :- फर्दापूर पोलीस ठाणे हद्दीत बनावट गावठी हातभट्टी दारूची निर्मिती व विक्री करणारा सराईत गुन्हेगार शांताराम मारोती शिंदे (वय 44, रा. पळसखेडा, ता. सोयगाव) यास एम.पी.डी.ए. कायद्यान्वये एक वर्षासाठी हर्सूल कारागृहात डांबण्यात आले आहे.

जिल्ह्यातील हातभट्टी, अवैध दारू विक्री व इतर धोकादायक गुन्हेगारी कृत्यांना आळा घालण्यासाठी पोलीस अधीक्षक डॉ. विनयकुमार राठोड यांनी सक्त कारवाईचा बडगा उगारला आहे. शिंदे याच्यावर दारूबंदी कायद्यांतर्गत ६ गुन्हे नोंद असून, यापूर्वीही प्रतिबंधात्मक कारवाई झाली होती. मात्र त्याचा काहीही परिणाम न झाल्याने पोलिसांनी एम.पी.डी.ए. अंतर्गत कठोर पाऊल उचलले.

जिल्हाधिकारी तथा जिल्हादंडाधिकारी दिलीप स्वामी यांनी 20 ऑगस्ट रोजी त्याच्याविरुद्ध स्थानबद्धतेचा आदेश दिला. त्यानुसार 21 ऑगस्ट रोजी त्याला मध्यवर्ती कारागृह, छत्रपती संभाजीनगर येथे स्थानबद्ध करण्यात आले.

ही कारवाई अपर पोलीस अधीक्षक अन्नपुर्णा सिंह यांच्या मार्गदर्शनाखाली, उपविभागीय पोलीस अधिकारी डॉ. दिनेशकुमार कोल्हे, पोलीस निरीक्षक विजयसिंह राजपूत यांच्यासह फर्दापूर पोलिसांच्या पथकाने केली.

👉 पोलिसांच्या या कठोर कारवाईमुळे गावठी हातभट्टी धंदेखोरांत भीतीचे वातावरण निर्माण झाले आहे.