‘मुलांचा आवाज’ मनपापर्यंत! CIOकडून उद्यान, सुरक्षा आणि शिक्षणासंदर्भात ठोस मागण्या

महाराष्ट्र वाणी न्युज 

छत्रपती संभाजीनगर(औरंगाबाद) दि १४ :- बालदिनाच्या (१४ नोव्हेंबर) निमित्ताने चिल्ड्रेन इस्लामिक ऑर्गनायझेशन (CIO) तर्फे शहरातील मुलांवर परिणाम करणाऱ्या विविध गंभीर समस्यांकडे लक्ष वेधण्यासाठी महापालिका प्रशासनास निवेदन देण्यात आले.

या निवेदनात मनपाच्या मोकळ्या जागांवर स्वच्छ, सुरक्षित बागा आणि खेळाची मैदाने निर्माण करण्याची मागणी करण्यात आली. सध्या अशा जागांवर असामाजिक घटकांनी अड्डे मांडल्याने मुलांच्या सुरक्षेचा प्रश्न निर्माण होतो. त्यामुळे या ठिकाणी कंपाउंड वॉल, झाडे आणि खेळणी बसवून जागांना उद्यानाच्या स्वरूपात विकसित करावे, अशी मागणी करण्यात आली.

विशेष उल्लेख करताना कट कट गेट एसटी कॉलनीतील समोसा ग्राउंड आणि विनर इंग्लिश हायस्कूलसमोरील मोकळी जागा तातडीने उद्यानात रूपांतरित करण्याची आवश्यकता अधोरेखित करण्यात आली.

यासोबतच शहरातील भटक्या कुत्र्यांच्या वाढत्या समस्येवर प्रभावी नियंत्रण आणण्याचीही मागणी निवेदनात करण्यात आली. या समस्येमुळे मुलांमध्ये निर्माण झालेली भीतीची भावना दूर होण्यासाठी सुरक्षित व मानवीय उपाययोजना करण्याची आवश्यकता असल्याचे CIOने स्पष्ट केले.

जाफर गेट परिसरात अलीकडेच मृत्यूमुखी पडलेल्या मुलाच्या कुटुंबास तात्काळ आर्थिक मदत देण्याचेही आवाहन या निवेदनात करण्यात आले.

शहरातील प्रत्येक मुलाला समान व गुणवत्तापूर्ण शिक्षण मिळावे, यासाठी शिक्षणाचा अधिकार कायद्याची प्रभावी अंमलबजावणी करावी, विशेषतः आर्थिकदृष्ट्या दुर्बल व वंचित घटकातील मुलांना प्राधान्य द्यावे, अशी मागणीही करण्यात आली.

या शिष्टमंडळात CIOच्या मकसूद कॉलनी, रेल्वे स्टेशन, समता नगर, सेंट्रल नाका, टाइम्स कॉलनी, मिल कॉर्नर आदी युनिट्समधील अनेक मुले सहभागी झाली होती. यामध्ये गुला मुस्तफा पठाण, नसीरा खान, अल्फिया शेख, दानियाल, झैनब, खंसा, हानिया, शववाफ, अर्सलान काजी, तैयमियाह, मूसा काजी आदींचा समावेश होता.

तसेच मुलांचे मेंटर्स आदिल मदनी, नाझिया तौसीफुल्लाह, इसरा मेराज ज़ैद, मसीरा इरफान खान, सुलताना खान, अरफाना, उजमा तौसीफ, लैका अंजुम आणि नाझमा बेगम हेही उपस्थित होते.