“‘माझी लाडकी बहीण’ योजनेबाबत माध्यमांतील बातम्या दिशाभूल करणाऱ्या; ५२ लाख लाभार्थी अपात्र नाहीत — मंत्री आदिती तटकरे यांचे स्पष्टीकरण”

महाराष्ट्र वाणी 

मुंबई दि २५ :- ‘माझी लाडकी बहीण’ योजनेबाबत काही प्रसारमाध्यमांवर प्रसारित झालेल्या बातम्यांमध्ये “५२ लाख महिला लाभार्थी अपात्र” असल्याचे दावे करण्यात आले होते. मात्र, हे दावे सरसकट खोटे आणि वस्तुस्थितीपासून दूर असल्याचे महिला व बालकल्याण मंत्री आदिती तटकरे यांनी स्पष्ट केले आहे.

मंत्री तटकरे म्हणाल्या की, या योजनेमध्ये पारदर्शकता आणण्यासाठी आणि पात्र महिलांना नियमितपणे आर्थिक लाभ मिळावा यासाठी राज्य शासनाने e-KYC प्रक्रिया सुरू केली आहे. ही प्रक्रिया अद्याप सुरू असून, छाननी पूर्ण झालेली नाही. त्यामुळे कोणत्याही महिलेला अपात्र ठरवण्यात आले असल्याची बातमी पूर्णपणे निराधार आहे.

त्यांनी पुढे सांगितले की, विविध माध्यमांतून येणाऱ्या अशा दिशाभूल करणाऱ्या माहितीवर विश्वास ठेवू नये. लाभार्थी महिलांनी फक्त राज्य शासनाचे अधिकृत संकेतस्थळ, शासन निर्णय आणि अधिकृत माध्यमांतूनच प्रसिद्ध होणाऱ्या माहितीवर विश्वास ठेवावा.

राज्य सरकारने लाभार्थ्यांच्या सोयीसाठी e-KYC ची अंतिम मुदत ३१ डिसेंबर २०२५ पर्यंत वाढवली आहे. त्यामुळे सर्व पात्र लाभार्थी भगिनींना ही प्रक्रिया निश्चित पूर्ण करण्याचे आवाहन मंत्री तटकरे यांनी केले आहे.

शेवटी त्यांनी स्पष्ट केले की, राज्य सरकारची भूमिका पारदर्शक असून पात्रतेची प्रक्रिया प्रामाणिकपणे सुरू आहे. कुणीही घाबरून जाऊ नये किंवा दिशाभूल करणाऱ्या बातम्यांच्या प्रभावाखाली येऊ नये.