महाराष्ट्रात सुशासनाची नवी गती! परीक्षेचा निकाल लागला की फक्त ४ दिवसांत नियुक्तीपत्र — सीएम फडणवीसांचा स्पष्ट आदेश

महाराष्ट्र वाणी न्युज 

मुंबई( प्रतिनिधी) दि १७ :- वर्षा निवासस्थान येथे झालेल्या बैठकीत मुख्यमंत्री देवेंद्र फडणवीस यांनी राज्यातील प्रशासकीय यंत्रणेवर सुशासनाच्या दिशेने मोठे निर्देश दिले. विविध शासकीय पदांच्या भरती परीक्षांचे निकाल लागल्यानंतर केवळ चार दिवसांत उत्तीर्ण उमेदवारांना नियुक्तीपत्र देण्याचे स्पष्ट आदेश त्यांनी विभागांना दिले.

यासोबतच दरवर्षी जानेवारी संपेपर्यंत उपलब्ध पदांनुसार ७५ टक्के पदोन्नती प्रक्रिया पूर्ण करण्याचे निर्देश देत प्रशासकीय कामकाजात गती आणि पारदर्शकता आणण्यावर त्यांनी भर दिला.

मुख्यमंत्र्यांनी सांगितले की, “नागरिक-केंद्रित, जबाबदार आणि प्रभावी सुशासनासाठी व्यापक प्रशासकीय सुधारणा राबविण्यात येत आहेत. प्रत्येक विभागाने सक्रिय सहभाग नोंदवत आपल्या कार्यक्षमता दाखवावी.”

🔹 मागे पडलेल्या विभागांना गती देण्याचा आदेश

प्रशासकीय सुधारणांमध्ये मागे पडलेल्या विभागांनी तातडीने कार्यवाही पूर्ण करून आपला अहवाल सादर करावा, असेही मुख्यमंत्र्यांनी स्पष्ट केले.

प्रत्येक विभागाने रिक्त पदांनुसार मागणीपत्र सादर करणे

अधिकारी-कर्मचाऱ्यांचे नियमित प्रशिक्षण

क्षमता वृद्धी कार्यक्रमांना चालना

🔹 ‘आपले सरकार 2.0’ लवकरच कार्यान्वित

नागरिकांना सर्व शासकीय सेवा वेगाने व विनाविलंब मिळाव्यात म्हणून ‘आपले सरकार 2.0’ पोर्टल तातडीने सुरू करण्याचे निर्देश देण्यात आले. तसेच राज्यातील आपले सरकार केंद्र व सेतू केंद्र यांचे सक्षमीकरण करण्यावरही भर देण्यात आला.

🔹 बैठकीला वरिष्ठ अधिकाऱ्यांची मोठी उपस्थिती

बैठकीत अप्पर मुख्य सचिव (सेवा) व्ही. राधा आणि समग्र संस्थेचे मुख्य कार्यकारी अधिकारी गौरव गोयल यांनी सादरीकरण केले. मुख्य सचिव राजेश कुमार यांच्यासह विविध विभागांचे अपर मुख्य सचिव, प्रधान सचिव आणि सचिव उपस्थित होते.

सुशासनाच्या दिशेने राज्य प्रशासनाची गती — आणि नागरिकांसाठी सेवांचा नवा अनुभव!