महाराष्ट्रात मुसळधार पावसाचा धोक्याचा इशारा! अनेक जिल्ह्यांना रेड व ऑरेंज अलर्ट 🚨

महाराष्ट्र वाणी न्युज 

मुंबई दि १८:- महाराष्ट्रात पुन्हा एकदा निसर्गाचा कहर ओढवण्याची चिन्हं दिसत आहेत. हवामान विभागाने राज्यातील अनेक जिल्ह्यांना रेड व ऑरेंज अलर्ट जारी केला आहे. मुंबईसह रायगड, पुणे घाट, सातारा घाट, रत्नागिरी आणि कोल्हापूर घाट या भागांमध्ये रेड अलर्ट देण्यात आला असून, मुसळधार ते अति-मुसळधार पावसाची शक्यता व्यक्त करण्यात आली आहे. तर, पालघर, ठाणे, सिंधुदुर्ग, जळगाव, छत्रपती संभाजीनगर, जालना, बीड, लातूर, अमरावती, चंद्रपूर आणि गडचिरोली या जिल्ह्यांना ऑरेंज अलर्ट देण्यात आला आहे.

🌊 समुद्रात खवळलेली स्थिती – मच्छिमारांना इशारा

भारतीय राष्ट्रीय महासागर माहिती सेवा केंद्र (#INCOIS) तर्फे मुंबई शहर, मुंबई उपनगर, ठाणे आणि रत्नागिरी जिल्ह्यांना दि. १८ ऑगस्ट २०२५ रोजी रात्री ११.३० वा. ते दि. २० ऑगस्ट २०२५ रोजी रात्री ८.३० वा. या कालावधीत ३.५ ते ४.३ मीटर उंच लाटांचा इशारा देण्यात आला आहे.

तर पालघर, रायगड आणि सिंधुदुर्ग जिल्ह्यांना दि. १९ ऑगस्ट सकाळी ८.३० वा. ते दि. २० ऑगस्ट रात्री ८.३० वा. पर्यंत ३.५ ते ४.२ मीटर उंच लाटांचा धोका वर्तविण्यात आला आहे.

या काळात समुद्राची स्थिती खवळलेली राहणार असून, ताशी ५० ते ६० किलोमीटर वेगाने जोरदार वारे वाहण्याची शक्यता आहे. त्यामुळे मच्छिमारांनी समुद्रात न जाण्याच्या सूचना प्रशासनाकडून देण्यात आल्या आहेत.

🚨 नागरिकांनी घ्याव्या खबरदारी

नद्यांचे पाणी पातळी झपाट्याने वाढू शकते, त्यामुळे नदीकिनारी जाणे टाळावे.

खडकाळ किनारपट्टीवर व समुद्रकिनाऱ्यावर गर्दी करु नये.

वीज पडण्याचा धोका असल्याने मोकळ्या जागेत उभे राहू नये.

स्थानिक प्रशासनाने दिलेल्या सूचनांचे पालन करावे.

राज्यातील पश्चिम महाराष्ट्र, कोकण पट्टा व विदर्भातील अनेक भागांत येत्या दोन दिवसांत मुसळधार पावसाचा तडाखा बसण्याची शक्यता वर्तविण्यात येत असल्याने नागरिकांनी सतर्क राहणे अत्यावश्यक आहे.

✨ महाराष्ट्र वाणी सोबत रहा – हवामान अपडेट्स सर्वप्रथम इथेच!