मनसेला धक्का! मध्य विभागाध्यक्ष चंदू नवपुते यांचा राजीनामा; ‘नेतृत्वाच्या दुर्लक्षामुळे पक्ष सोडतो’

महाराष्ट्र वाणी न्युज 

छत्रपती संभाजीनगर(औरंगाबाद) दि १५ :- मनसेच्या छत्रपती संभाजीनगर मध्य विधानसभा विभागाला मोठा धक्का बसला आहे. विभागाध्यक्ष चंदू नवपुते यांनी आपल्या पदाचा तसेच मनसेच्या प्राथमिक सदस्यत्वाचाही राजीनामा आज (१५ नोव्हेंबर २०२५) जाहीर केला. हा राजीनामा त्यांनी थेट पक्षाध्यक्ष राजसाहेब ठाकरे यांना पत्राद्वारे पाठवला आहे.

नवपुते यांनी राजीनामा पत्रात पक्षावरील नाराजी उघडपणे व्यक्त केली आहे. “२००८ पासून मनसेच्या विचारांनी प्रेरित होऊन कार्यरत राहिलो. लोकहितासाठी आंदोलने केली, गुन्ह्यांचाही सामना केला; मात्र पक्षनेत्यांकडून मार्गदर्शन, पाठिंबा किंवा कौतुक मिळाले नाही,” असा त्यांनी उल्लेख केला आहे.

तसेच, “राजसाहेबांची भेट घेण्याचा अनेकदा प्रयत्न केला, पण संधी दिली गेली नाही. स्थानिक पातळीवर अकार्यक्षम नेतृत्वाखाली पुढे काम करणे शक्य नाही. मला पक्ष सोडायची इच्छा नसतानाही ही वेळ आली,” असे नवपुते म्हणाले.

राजीनाम्याच्या शेवटी नवपुतेंनी ‘जय महाराष्ट्र!’ असा उल्लेख करत पक्षाला शुभेच्छा दिल्या.

 राजीनाम्यानंतर मनसेच्या स्थानिक राजकारणात कोणते नवे समीकरण निर्माण होते, याकडे शहराची नजर!