बेगमपुरा–जायसिंगपुरात काँग्रेसची ताकद दाखवणारी भव्य पदयात्रा; जनसमर्थनाचा जोरदार ओघ

महाराष्ट्र वाणी 

छत्रपती संभाजीनगर (औरंगाबाद), दि. ११ —

बेगमपुरा, पहाडसिंगपुरा, जयसिंगपुरा परिसरात भारतीय राष्ट्रीय काँग्रेस पक्षाच्या पदयात्रेला नागरिकांचा मोठ्या प्रमाणावर प्रतिसाद लाभला. महानगरपालिका निवडणुकीच्या पार्श्वभूमीवर प्रभाग क्रमांक ३ मधील काँग्रेसच्या अधिकृत उमेदवारांच्या प्रचारासाठी ही पदयात्रा उत्साहात पार पडली.

प्रभाग ३ (अ) चे उमेदवार कृष्णा बनकर, प्रभाग ३ (ब) सविता सलामपुरे, प्रभाग ३ (क) अस्मा खान आणि प्रभाग ३ (ड) चे उमेदवार शेख सलीम युसूफ यांच्या प्रचारासाठी खासदार डॉ. कल्याण काळे यांच्या प्रमुख उपस्थितीत बेगमपुरा, पहाडसिंगपुरा, कुंभार गल्ली, जयसिंगपुरा आणि हनुमान टेकडी परिसरातून भव्य पदयात्रा काढण्यात आली.

या पदयात्रेदरम्यान काँग्रेसच्या घोषणा, कार्यकर्त्यांचा जोश आणि नागरिकांचा उत्स्फूर्त सहभाग पाहायला मिळाला. स्थानिक विकास, नागरी सुविधा आणि सर्वसमावेशक राजकारणाच्या मुद्द्यांवर काँग्रेस उमेदवारांना मत देण्याचे आवाहन करण्यात आले.

यावेळी जिल्हाध्यक्ष किरण पाटील डोणगावकर, शहर जिल्हाध्यक्ष शेख युसूफ, प्रभागातील पदाधिकारी, कार्यकर्ते तसेच मोठ्या संख्येने सामान्य नागरिक उपस्थित होते. पदयात्रेमुळे परिसरात काँग्रेसच्या प्रचाराला नवे बळ मिळाल्याचे चित्र दिसून आले.

जनतेचा हा विश्वासच विजयाचा मार्ग ठरवेल, असा आत्मविश्वास काँग्रेस नेत्यांनी व्यक्त केला.