💧“पाण्यासाठीची प्रतीक्षा संपली!” – आंबेडकर जयंतीदिवशी संभाजीनगरच्या दारात जायकवाडीचं पाणी

महाराष्ट्र वाणी

छत्रपती संभाजीनगर(औरंगाबाद) दि १५ :- भारतरत्न डॉ. बाबासाहेब आंबेडकर यांच्या जयंतीच्या दिवशी शहरवासीयांना मोठी दिलासादायक बातमी मिळाली आहे. अनेक वर्षांपासून प्रलंबित असलेल्या पाणीप्रश्नावर आता मोठं समाधान मिळालं असून जायकवाडी धरणातून नव्या पाणीपुरवठा योजनेअंतर्गत नक्षत्रवाडी जलशुद्धीकरण केंद्रात (WTP) अखेर 14 एप्रील रोजी यशस्वीपणे पाणी पोहोचलं आहे.

काही दिवसांपूर्वी सुरू झालेल्या चाचण्यांमध्ये टप्प्याटप्प्याने पाईपलाईनची तपासणी पूर्ण करण्यात आली होती. आज या सर्व प्रक्रियेनंतर प्रत्यक्षात पाणी शहराच्या उंबरठ्यावर पोहोचल्याने हा ऐतिहासिक क्षण ठरला आहे.

शहराच्या वाढत्या लोकसंख्येचा आणि भविष्यातील गरजांचा विचार करून राबवण्यात आलेली ही महत्त्वाकांक्षी योजना केवळ पायाभूत सुविधा नसून नागरिकांच्या विश्वासाची पूर्तता करणारी ठरत आहे. सुमारे ३८ किमी लांबीच्या जलवाहिनीद्वारे आणि अत्याधुनिक यंत्रणेमार्फत पाणीपुरवठा करण्याचे काम आता अंतिम टप्प्यात आले आहे.

या प्रकल्पामुळे दररोज सुमारे २०० एमएलडी अतिरिक्त पाणी उपलब्ध होणार असून पुढील ३० वर्षांसाठी शहराचा पाणीप्रश्न मोठ्या प्रमाणात मार्गी लागणार आहे. त्यामुळे वारंवार होणारी पाणीटंचाई आता भूतकाळात जमा होण्याची शक्यता व्यक्त होत आहे.

या यशाबद्दल बोलताना मंत्री अतुल सावे यांनी सांगितले की, “मुख्यमंत्री देवेंद्र फडणवीस यांच्या मार्गदर्शनाखाली आणि शासनाच्या सातत्यपूर्ण प्रयत्नांमुळे सुमारे २७४० कोटी रुपयांची ही योजना पूर्णत्वाकडे पोहोचली आहे. नागरिकांनी दाखवलेल्या विश्वासामुळेच हे शक्य झाले.”

या प्रकल्पामुळे आता छत्रपती संभाजीनगरच्या विकासाला मोठी चालना मिळणार असून नागरिकांना पाण्याच्या समस्येतून मोठा दिलासा मिळणार आहे.

👉 “पाण्याचा थेंब-थेंब आता विकासाची गाथा लिहिणार… संभाजीनगर नव्या युगात प्रवेश करत आहे!”