🚀 परदेशात शिक्षणाचे स्वप्न आता होणार साकार! अल्पसंख्याक विद्यार्थ्यांसाठी महाराष्ट्र सरकारची परदेश शिष्यवृत्ती योजना सुरू

महाराष्ट्र वाणी

छत्रपती संभाजीनगर (औरंगाबाद) दि १९ :- परदेशात उच्च शिक्षण घेण्याचे स्वप्न पाहणाऱ्या अल्पसंख्याक समाजातील विद्यार्थ्यांसाठी मोठी आनंदाची बातमी आहे. महाराष्ट्र शासनाच्या अल्पसंख्याक विकास विभागामार्फत 2026-27 या शैक्षणिक वर्षासाठी परदेश शिष्यवृत्ती योजना जाहीर करण्यात आली असून, ऑनलाइन अर्ज प्रक्रिया सुरू झाली आहे.

या योजनेअंतर्गत परदेशात पोस्ट ग्रॅज्युएशन (PG) आणि पीएचडी शिक्षण घेणाऱ्या विद्यार्थ्यांना मोठा आर्थिक आधार दिला जाणार आहे. विद्यार्थ्यांच्या शिक्षणासाठी संपूर्ण ट्युशन फी, ये-जा करण्यासाठी विमान प्रवास खर्च, राहणीमानासाठी वार्षिक निर्वाह भत्ता, पुस्तके व प्रकल्पांसाठी अतिरिक्त आर्थिक मदत तसेच आरोग्य विम्याचा खर्च शासनाकडून दिला जाणार आहे.

या योजनेसाठी अर्जदार हा महाराष्ट्राचा रहिवासी असणे आवश्यक आहे. मुस्लिम, बौद्ध, ख्रिश्चन, जैन, शीख, पारसी आणि ज्यू समाजातील विद्यार्थी अर्ज करू शकतात. कुटुंबाचे वार्षिक उत्पन्न 8 लाख रुपयांपेक्षा जास्त नसावे. तसेच PG साठी पदवी आणि पीएचडीसाठी पदव्युत्तर शिक्षणात किमान 55 टक्के गुण आवश्यक आहेत.

विद्यार्थ्यांनी QS World University Ranking मधील टॉप-200 विद्यापीठांमध्ये प्रवेश घेतलेला असावा आणि प्रवेश Unconditional असणे बंधनकारक आहे. विशेष म्हणजे एकूण जागांपैकी 30 टक्के जागा मुलींसाठी राखीव ठेवण्यात आल्या आहेत.

इच्छुक विद्यार्थ्यांनी 18 जुलै 2026 रोजी सायंकाळी 6:15 वाजेपर्यंत ऑनलाइन अर्ज भरायचा आहे. अर्ज भरल्यानंतर त्याची प्रत आणि आवश्यक कागदपत्रे अल्पसंख्याक आयुक्तालय, छत्रपती संभाजीनगर येथे जमा करणे बंधनकारक आहे.

📞 अधिक माहितीसाठी : 240-2992885

विदेशात शिक्षण घेण्याची संधी तुमच्या दारात आली आहे; ही माहिती गरजू विद्यार्थ्यांपर्यंत नक्की पोहोचवा!