जबरी चोरी प्रकरण उघड – सराईत चोरटे जेरबंद!

महाराष्ट्र वाणी न्युज 

छत्रपती संभाजीनगर(औरंगाबाद) दि ५ :- ग्रामीण पोलिसांच्या स्थानिक गुन्हे शाखेने धडाकेबाज कारवाई करत जबरी चोरी करणारे दोन सराईत आरोपी जेरबंद केले आहेत. २४ जुलै रोजी भालगाव शिवारात घडलेल्या या गंभीर गुन्ह्याचा छडा लावण्यात पोलिसांना यश आले आहे.

घटनेचा तपशील

२४ जुलै २०२५ रोजी रात्री, चिकलठाणा पोलिस ठाण्याच्या हद्दीत मौजे भालगाव शिवारात मधुराबाई सुधाकर बनकर यांच्या शेतवस्तीत तीन अज्ञात चोरट्यांनी पत्रा कापून घरात प्रवेश केला. यावेळी फिर्यादी व तिच्या पतीवर जीवघेणा हल्ला करून सोन्याचे दागिने व रोख रक्कम लंपास करण्यात आली. या प्रकरणी चिकलठाणा पोलीस ठाण्यात गु.र.नं. ३९०/२०२५ कलम ३०९ (६) प्रमाणे गुन्हा दाखल करण्यात आला होता.

तपास मोहीम

गुन्ह्याचा तपास सुरू असताना पोलिस अधीक्षक डॉ. विनयकुमार राठोड आणि अपर पोलीस अधीक्षक अन्नपूर्णासिंह यांच्या मार्गदर्शनाखाली पोलीस निरीक्षक (स्थानीक गुन्हे शाखा) विजयसिंह राजपुत यांनी विशेष पथक तयार करून तपासाचे सुत्रे हाती घेतली.

समांतर तपास व तांत्रिक माहितीच्या आधारे संशयित शारुख उर्फ अब्राशा पवार व लखन उर्फ लुकास पन्या पवार यांचा गुन्ह्यात सहभाग असल्याचे स्पष्ट झाले.

सापळा आणि अटक

४ सप्टेंबर रोजी गुप्त माहितीच्या आधारे स्थानिक गुन्हे शाखेच्या पथकाने आपतगाव शिवार, सोलापूर–धुळे हायवेवर सापळा रचला. पाचोडकडून येणारी मोटारसायकल थांबवून तपास केल्यावर त्यावरील इसम शारुख अब्राशा पवार (रा. आवडे उचेगाव) व लुकास पन्या पवार (रा. चंदनापुरी) असल्याचे समोर आले. पोलिसांनी त्यांना ताब्यात घेऊन चौकशी केली असता, त्यांनी गुन्ह्याची कबुली दिली.

जप्त केलेला मुद्देमाल

आरोपींकडून गुन्ह्यात वापरलेली मोटारसायकल व मोबाईल जप्त करण्यात आला असून पुढील तपास चिकलठाणा पोलीस करीत आहेत.

पोलिसांची कामगिरी

ही कारवाई पोलीस अधीक्षक डॉ. विनयकुमार राठोड, अपर पोलीस अधीक्षक अन्नपूर्णासिंह यांच्या मार्गदर्शनाखाली पो.नि. विजयसिंह राजपुत यांच्या नेतृत्वाखाली पार पडली. या मोहिमेत स.पो.नि. पवन इंगळे, पो.उप.नि. महेश घुगे, पो.हवालदार वाल्मीक निकम, शिवानंद बनगे, अशोक वाघ, पो.अं. महेश बिरुटे, अनिल काळे, संजय तांदळे, योगेश तरमाळे, जीवन घोलप यांनी सक्रिय सहभाग घेतला.

🔹 छत्रपती संभाजीनगर ग्रामीण पोलिसांच्या दक्ष तपासामुळे गंभीर गुन्ह्याचा छडा लागला असून नागरिकांमध्ये पोलिसांबद्दलचा विश्वास अधिक दृढ झाला आहे.