१८ वर्षांची आमदारकी, तरी पदवीधरांचे प्रश्न कायम; सतीश चव्हाणांच्या उमेदवारीवर मतदारांचे रोखठोक सवाल

छत्रपती संभाजीनगर(औरंगाबाद) दि ८ :- मराठवाडा पदवीधर मतदारसंघातून सतीश चव्हाण यांना पुन्हा उमेदवारी मिळाल्यानंतर त्यांच्या दीर्घ राजकीय कारकिर्दीवरून पदवीधर मतदारांमध्ये चर्चा सुरू झाली आहे. सलग तीन टर्म विधानपरिषदेत प्रतिनिधित्व केल्यानंतरही सुशिक्षित बेरोजगार, शिक्षक आणि प्राध्यापकांचे अनेक प्रश्न कायम असल्याचा आरोप काही मतदारांकडून केला जात आहे.

याच पार्श्वभूमीवर सतीश चव्हाण यांच्या १८ वर्षांच्या आमदारकीच्या कामाचा आढावा घेण्याची मागणीही पदवीधर मतदारांकडून होत असल्याचे चित्र आहे.

मतदारांचे तीन थेट सवाल

१) सुशिक्षित बेरोजगारांसाठी ठोस काय केले?

मराठवाड्यातील हजारो सुशिक्षित युवक रोजगाराच्या प्रतीक्षेत आहेत. स्पर्धा परीक्षांमधील अडचणी, भरती प्रक्रियेतील विलंब आणि रोजगाराच्या मर्यादित संधी यामुळे तरुणांमध्ये अस्वस्थता आहे. अशा परिस्थितीत आपल्या दीर्घ आमदारकीच्या काळात रोजगारनिर्मितीसाठी नेमकी कोणती ठोस पावले उचलली, असा सवाल मतदारांकडून उपस्थित केला जात आहे.

२) शिक्षक-प्राध्यापकांच्या प्रश्नांवर किती प्रभावी पाठपुरावा?

शिक्षक व प्राध्यापकांच्या रखडलेल्या भरती प्रक्रिया, वेतनाचे प्रश्न आणि शिक्षण क्षेत्रातील विविध प्रलंबित मागण्यांबाबत विधानपरिषदेत किती प्रभावीपणे आवाज उठवण्यात आला, याचे उत्तर मतदारांना अपेक्षित असल्याची चर्चा आहे.

३) १८ वर्षांच्या प्रतिनिधित्वातून पदवीधरांच्या पदरात काय पडले?

तीन सलग कार्यकाळ आमदार म्हणून काम करण्याची संधी मिळाल्यानंतर पदवीधर मतदारसंघासाठी कोणते मोठे आणि दीर्घकालीन निर्णय घडवून आणले, असा प्रश्न आता चर्चेत आला आहे. केवळ निवडणुकीच्या काळात उमेदवारी आणि राजकीय प्रतिनिधित्व यापलीकडे पदवीधरांसाठी ठोस परिणाम काय दिसून येतात, असा सवाल काही मतदार करत आहेत.

रोजगार आणि शिक्षणाच्या प्रश्नांवर नाराजीचा सूर

मराठवाड्यातील सुशिक्षित बेरोजगारांसमोर रोजगाराचा प्रश्न गंभीर आहे. स्पर्धा परीक्षांमधील गोंधळ, शिक्षक व प्राध्यापक भरतीतील विलंब, वेतनाशी संबंधित प्रश्न तसेच कंत्राटी कर्मचाऱ्यांच्या समस्या यामुळे शिक्षित वर्गात नाराजी असल्याचे मतदारांचे म्हणणे आहे.

या प्रश्नांवर सातत्याने आणि आक्रमकपणे पाठपुरावा होणे अपेक्षित होते. मात्र, आपल्या १८ वर्षांच्या प्रतिनिधित्वाच्या तुलनेत अपेक्षित परिणाम दिसून आले नाहीत, अशी टीका काही पदवीधर मतदारांकडून केली जात आहे.

‘१८ नख्या...’ या म्हणीचीही मतदारसंघात चर्चा

सतीश चव्हाण यांच्या उमेदवारीच्या पार्श्वभूमीवर सध्या एका स्थानिक म्हणीचा राजकीय टोमणा म्हणून वापर होत असल्याची चर्चा आहे. दीर्घकाळ पद आणि संधी असूनही अपेक्षित कामगिरी झाली नाही, असा संदेश देण्यासाठी काही विरोधकांकडून ‘अठरा नख्या अन् खेटर राख्या’ या म्हणीचा उल्लेख केला जात आहे.

मात्र, हा विरोधकांकडून केला जाणारा राजकीय टोमणा असून तो मतदारसंघातील सर्व मतदारांचे मत आहे, असे म्हणता येणार नाही.

‘पुन्हा मतदान का करायचे?’ हा मुख्य सवाल

सतीश चव्हाण यांना पुन्हा उमेदवारी मिळाल्यानंतर सोशल मीडिया तसेच स्थानिक पातळीवर त्यांच्या कामगिरीबाबत प्रश्न उपस्थित होत आहेत. विशेषतः तरुण पदवीधर, बेरोजगार आणि शिक्षक वर्गातील काही घटकांकडून १८ वर्षांच्या कार्यकाळाचा हिशेब मागितला जात आहे.

“इतका प्रदीर्घ काळ प्रतिनिधित्व करण्याची संधी मिळाल्यानंतरही मूलभूत प्रश्न कायम असतील, तर पुन्हा त्यांनाच मतदान का करायचे?” असा थेट सवाल काही मतदारांकडून उपस्थित केला जात आहे.

आगामी पदवीधर मतदारसंघाच्या निवडणुकीत सतीश चव्हाण यांच्या दीर्घ राजकीय अनुभवापेक्षा त्यांच्या कार्यकाळातील प्रत्यक्ष कामगिरी, पदवीधरांसाठी केलेला पाठपुरावा आणि रोजगार-शिक्षण क्षेत्रातील योगदान यावर मतदार किती भर देतात, हे पाहणे महत्त्वाचे ठरणार आहे.

महाराष्ट्र वाणी | सत्यासाठी निर्भीड | जनतेसाठी समर्पित