🔥 ‘टेबलाखालची व्यवहारं थांबवा!’ — महसूल मंत्र्यांचा इशारा; तहसीलदार-एसडीएम कॅबिनमध्ये CCTV लावण्याचे आदेश

महाराष्ट्र वाणी 

छत्रपती संभाजीनगर(औरंगाबाद) दि १६ :- लोकाभिमुख प्रशासन उभारायचं असेल, तर अधिकाऱ्यांची वागणूकही तितकीच पारदर्शक आणि जबाबदार असली पाहिजे, असा स्पष्ट संदेश महसूल मंत्री चंद्रशेखर बावनकुळे यांनी दिला. केवळ भव्य प्रशासकीय इमारती उभारून उपयोग नाही, तर भ्रष्टाचाराला आळा घालणं तितकंच गरजेचं असल्याचं त्यांनी ठणकावून सांगितलं.

दिनांक १५ एप्रील रोजी भंडारा जिल्ह्यातील लाखांदूर येथे सुमारे २२ कोटी रुपयांच्या खर्चातून उभारण्यात आलेल्या मध्यवर्ती प्रशासकीय इमारतीच्या लोकार्पण सोहळ्यात ते बोलत होते. यावेळी त्यांनी अधिकाऱ्यांना थेट सुनावलं की, “जर टेबलाखालून व्यवहार सुरूच राहणार असतील, तर अशा यंत्रणेला लोकाभिमुख म्हणता येणार नाही.”

भ्रष्टाचारावर नियंत्रण ठेवण्यासाठी तहसीलदार आणि एसडीएम यांच्या कॅबिनमध्ये सीसीटीव्ही कॅमेरे बसवण्याच्या स्पष्ट सूचना त्यांनी दिल्या. हे कॅमेरे थेट जिल्हाधिकाऱ्यांच्या कक्षाशी जोडण्यात यावेत, जेणेकरून कामकाजावर सतत देखरेख राहील, असंही त्यांनी नमूद केलं.

“लोकाभिमुख प्रशासन हे फक्त भाषणांमधून नव्हे, तर प्रत्यक्ष कृतीतून दिसलं पाहिजे,” असे सांगत बावनकुळे यांनी प्रशासनातील पारदर्शकतेवर भर दिला. त्यांच्या या भूमिकेमुळे उपस्थित अधिकाऱ्यांमध्ये खळबळ उडाली.

👉 शेवटी एकच प्रश्न — आता ‘सिस्टम’ बदलेल का, की पुन्हा जुनीच पद्धत सुरू राहणार?