🎹 “आयुक्तांची सरप्राईज भेट; छोट्या ‘रॉकस्टार’ दानिशला ईद निमित्त पियानो भेट”

महाराष्ट्र वाणी

छत्रपती संभाजीनगर(औरंगाबाद) दि २३ महानगरपालिकेच्या शिक्षण विभागातर्फे राबविण्यात येत असलेल्या “स्मार्ट स्कूल टू बेस्ट स्कूल” या महत्त्वाकांक्षी प्रकल्पाचे सकारात्मक परिणाम आता प्रत्यक्षात दिसू लागले आहेत. या उपक्रमामागील प्रेरणास्थान असलेले आयुक्त जी. श्रीकांत यांनी एका इयत्ता दुसरीतील विद्यार्थ्याच्या घरी जाऊन त्याला दिलेली सरप्राईज भेट सध्या शहरात चर्चेचा विषय ठरली आहे.

महानगरपालिकेच्या शाळेतील विद्यार्थी दानिश शेख याचा गायनाचा व्हिडिओ सोशल मीडियावर प्रचंड व्हायरल झाला. इंस्टाग्रामवर तब्बल ३० लाखांहून अधिक लोकांनी हा व्हिडिओ पाहिला असून सुमारे दीड लाख लाईक्स मिळाले आहेत. ‘सिम्फनी ऑफ CSMC स्कूल बँड’ या उपक्रमातून घडत असलेल्या या छोट्या कलाकाराची दखल थेट आयुक्तांनी घेतली.

रमजान ईदच्या मुहूर्तावर आयुक्त जी. श्रीकांत यांनी शंभूनगरमधील अरुंद गल्लीत असलेल्या दानिशच्या घरी थेट भेट दिली. विशेष म्हणजे, गाडी न जाऊ शकणाऱ्या रस्त्यावरून ते पायी चालत त्याच्या घरी पोहोचले. या भेटीत त्यांनी दानिशला पियानो भेट देत त्याच्या कलेला प्रोत्साहन दिले.

अत्यंत साध्या परिस्थितीत राहणाऱ्या दानिशच्या कुटुंबासाठी हा क्षण भावनिक ठरला. मुलाच्या कर्तृत्वामुळे आनंदित झालेल्या वडिलांच्या डोळ्यांत अश्रू दाटून आले. आयुक्तांनी दानिशला गाणे म्हणायला सांगितले असता, त्याने निरागसपणे सादर केलेल्या गाण्याने उपस्थित सर्वांचे मन जिंकले.

दानिशच्या अंगी असलेली नैसर्गिक कला, आत्मविश्वास आणि संगीताची आवड पाहून आयुक्तही भारावून गेले. “स्मार्ट स्कूल टू बेस्ट स्कूल” या संकल्पनेतून घडणाऱ्या विद्यार्थ्यांच्या यशाचे हे जिवंत उदाहरण असल्याची भावना त्यांनी व्यक्त केली.

 छोट्या दानिशच्या यशाने पुन्हा एकदा सिद्ध केलंय—संधी मिळाली, तर प्रतिभा कोणत्याही गल्लीतून जागतिक मंचावर झेप घेऊ शकते!