🛠️ नवाबपुरा-मोंढा रस्ता विस्तारात अडथळा ठरलेली तीन अतिक्रमणे हटवली!

महाराष्ट्र वाणी न्युज 

छत्रपती संभाजीनगर(औरंगाबाद), दि. ३० जुलै :

नवाबपुरा ते मोंढा दरम्यानच्या 15 मीटर रुंद विकास योजना रस्त्यावरील तीन अतिक्रमणांची आज छत्रपती संभाजीनगर महापालिकेच्या पथकाने कारवाई करून हटवणूक केली. विशेष म्हणजे संबंधित अतिक्रमणधारकांनी महापालिकेकडून मोबदला घेतलेला असतानाही जागा ताब्यातून न सोडता दुकाने बांधून ती भाडेतत्त्वावर दिली होती.

महानगरपालिकेने नगर भूमापन क्र. 8613 या मिळकतीचा मोबदला देऊन हक्क सोड प्रमाणपत्र घेतले होते. मात्र, पूर्वीचे मालक दुकाने चालवत होते. त्यांना आठ दिवसांपूर्वी जागा रिकामी करण्याचा इशारा दिला होता. परंतु प्रतिसाद न दिल्याने आज सकाळी प्रशासनाने थेट कारवाई केली.

महापालिका आयुक्त तथा प्रशासक जी. श्रीकांत यांच्या आदेशानुसार, झोन क्र. 2 चे सहाय्यक आयुक्त रमेश मोरे आणि इमारत निरीक्षक मजहर अली यांच्या नेतृत्वाखाली अतिक्रमण विरोधी पथकाने जेसीबीच्या साहाय्याने बांधकाम हटवले.

राजा बाजार चौक परिसरातील अशाच स्वरूपाच्या इतर अतिक्रमणांवरही लवकरच कारवाई होणार असल्याचे संकेत प्रशासनाकडून मिळाले आहेत.

 विकासाच्या मार्गात अडथळे येणार नाहीत, असा प्रशासनाचा इशारा स्पष्ट!