🔱 श्रावण प्रदोषानिमित्त अंभई गावात पारंपरिक कावड यात्रेचे आयोजन; शिवभक्तांचा उत्स्फूर्त सहभाग

महाराष्ट्र वाणी न्युज दि ७ ऑगस्ट

अंभई (ता. सिल्लोड):- श्रावण मासाच्या पवित्र प्रदोष दिनानिमित्त अंभई गावात पारंपरिक कावड यात्रेचे भव्य आयोजन करण्यात आले होते. सुप्रसिद्ध कथा वाचक पं. प्रदीप मिश्रा महाराज यांच्या धार्मिक प्रेरणेतून बुधवारी (दि. ६ ऑगस्ट) ही यात्रा उत्साहात पार पडली.

कावड यात्रेस प्रारंभ विघ्नहर्ता गणेश मंदिरापासून झाला. गावातील लहान मुले, युवक, महिलांपासून ते ज्येष्ठ नागरिकांपर्यंत विविध वयोगटातील शिवभक्त या यात्रेत सहभागी झाले होते. भक्तांनी आपल्या घरातील शुद्ध व स्वच्छ जल तांब्याच्या दोन लोट्यांच्या कावडीमध्ये भरून, टाळ-मृदंगाच्या गजरात गावभर दिंडी आणि मिरवणूक काढली.

यात्रेदरम्यान गावाला प्रदक्षिणा घालण्यात आली आणि नंतर सर्व भक्तगण वडेश्वर महादेव मंदिरात एकत्र जमले. याठिकाणी महादेवाच्या शिवपिंडीचे विधीवत पूजन, नैवेद्य, आरती व जलाभिषेक करण्यात आला. संपूर्ण वातावरण हर हर महादेवच्या जयघोषाने भक्तिमय झाले होते.

या कावड यात्रेच्या आयोजनासाठी शिवभक्त सुनील मांगुळकर, अशोक सोनवणे, कैलास सोनवणे, शेषराव काजळे, गणेश श्रीवास्तव, अंकुश जाधव आणि केतन मांगुळकर यांनी विशेष मेहनत घेतली. त्यांच्या नियोजनामुळे संपूर्ण कार्यक्रम अत्यंत शिस्तबद्ध आणि मंगल वातावरणात पार पडला.

 ‘हर हर महादेव’ च्या जयघोषात अंभईने दाखवली श्रद्धेची सुंदर झलक!