लाचलुचपत प्रतिबंधक पथकाची यशस्वी सापळा कारवाई – मुख्याध्यापक व खाजगी ईसमास 20 हजारांची लाच घेताना रंगेहात पकडले

छत्रपती संभाजीनगर(औरंगाबाद) दि. १० :– लाचलुचपत प्रतिबंधक विभागाने (ला.प्र.वि.) आज छत्रपती संभाजीनगरात सापळा कारवाई करत एक मुख्याध्यापक व एका खाजगी इसमाला तब्बल 20 हजार रुपयांची लाच स्वीकारताना रंगेहात पकडले.

तक्रारदार महिला (वय 51) यांनी दिलेल्या लेखी तक्रारीनुसार, जि.प. केंद्रीय उच्च प्राथमिक शाळा, सातारा गाव येथील मुख्याध्यापक सोमनाथ भागुजी भावले (वय 52) यांनी अर्जित रजेवर सोडण्यासाठी 20 हजार रुपयांची लाच मागितली होती. ही मागणी पडताळून पाहण्यासाठी आज सरकारी पंचांच्या उपस्थितीत कारवाई करण्यात आली. त्यानुसार मुख्याध्यापकांनी खाजगी इसम गणेश रामनाथ कोथिंबीरे (वय 26) यांच्यामार्फत ही रक्कम स्वीकारली.

कारवाईदरम्यान मुख्याध्यापक व खाजगी इसम दोघांना ताब्यात घेण्यात आले असून त्यांच्या ताब्यातून मोबाईल फोन तसेच 20 हजार रुपयांची लाच रक्कम जप्त करण्यात आली आहे. सदर घटनेत गुन्हा दाखल करण्याची प्रक्रिया सातारा पोलीस ठाण्यात सुरू आहे.

या कारवाईत पोलीस निरीक्षक संगिता एस. पाटील यांच्या नेतृत्वाखालील पथकात पो.ह. सचिन बारसे, पो.अंम. राजेंद्र नंदिले, दिपक ईगले आणि सी. एन. बागुल यांनी सहभाग घेतला. या संपूर्ण कारवाईचे मार्गदर्शन पोलीस अधीक्षक श्रीमती माधुरी केदार कांगणे, अप्पर पोलीस अधीक्षक शशिकांत सिंगारे आणि उपअधीक्षक सुरेश नाईकनवरे यांनी केले.

ला.प्र.वि. विभागाने आवाहन केले आहे की, शासकीय कामासाठी कोणताही अधिकारी किंवा कर्मचारी अथवा त्यांचे वतीने खाजगी इसम जर कायदेशीर फी व्यतिरिक्त लाच मागत असतील तर नागरिकांनी तात्काळ तक्रार करावी.

👉 टोल फ्री क्रमांक : 1064

👉 ला.प्र.वि. छत्रपती संभाजीनगर संपर्क : 7720891064

🔚 महाराष्ट्र वाणी — तुमच्या हक्काचा आवाज