🔴 रिव्हॉल्वरचा धाक दाखवून दरोडा; ६ जणांच्या टोळीचा पर्दाफाश – स्थानिक गुन्हे शाखेची दमदार कारवाई!

महाराष्ट्र वाणी

छत्रपती संभाजीनगर(औरंगाबाद), दि. १६ : – कारचालकाला रिव्हॉल्वरचा धाक दाखवत लुटमार करणाऱ्या सहा जणांच्या टोळीचा स्थानिक गुन्हे शाखेने पर्दाफाश करत आरोपींना जेरबंद केले आहे. या कारवाईमुळे परिसरात मोठी खळबळ उडाली असून पोलिसांच्या तत्परतेचे कौतुक होत आहे.

दि. ०९ एप्रिल रोजी रात्रीच्या सुमारास पदमा हॉटेल ते शिवदत्त पेट्रोलपंप दरम्यान देवळाई चौकाजवळील गोठ्याजवळ दोन मोटारसायकलींवरून आलेल्या सहा आरोपींनी सुदामराव आबासाहेब शिंदे (वय ६७, रा. हातडी, ता. घनसांवगी, जि. जालना, सध्या बीड बायपास, संभाजीनगर) यांना अडवून रिव्हॉल्वरचा धाक दाखवला. त्यानंतर त्यांच्या गळ्यातील सुमारे पाच तोळ्यांची सोन्याची चैन हिसकावून आरोपी फरार झाले होते.

या प्रकरणी चिकलठाणा पोलीस ठाण्यात दि. १० एप्रिल रोजी गुन्हा दाखल करण्यात आला होता. गुन्ह्याचे गांभीर्य लक्षात घेऊन पोलीस अधिक्षकांच्या आदेशानुसार स्थानिक गुन्हे शाखेने तपासाला वेग दिला. सीसीटीव्ही फुटेज व गोपनीय माहितीच्या आधारे आरोपींचा माग काढण्यात आला.

दि. १५ एप्रिल रोजी बीड बायपासवरील बाळापूर फाट्यावर सापळा रचून रोहित रविंद्र काळे याला ताब्यात घेण्यात आले. चौकशीदरम्यान त्याने साथीदारांसह गुन्हा केल्याची कबुली दिली. त्यानंतर पोलिसांनी सुरज काळे, ऋषिकेश उदावंत व इतर साथीदारांना स्वराजनगर-मुकुंदवाडी परिसरातून अटक केली.

चौकशीत आरोपींनी लुटलेली सोन्याची चैन विकून पैसे आपापसात वाटून घेतल्याचे कबूल केले. त्यातून काहींनी बुलेट मोटारसायकलही खरेदी केल्याचे उघड झाले. पोलिसांनी आरोपींकडून गुन्ह्यात वापरलेली यमाहा एफझेड मोटारसायकल, मोबाईल फोन तसेच सुमारे ४.२६ लाख रुपयांचा मुद्देमाल जप्त केला आहे. तसेच सोन्याच्या चैनमधील काही भागही हस्तगत करण्यात आला आहे.

सदर प्रकरणातील एक आरोपी अद्याप फरार असून त्याचा शोध सुरू आहे. पुढील तपास चिकलठाणा पोलीस करत आहेत.

ही कारवाई पोलीस अधिक्षक डॉ. विनयकुमार राठोड, अप्पर पोलीस अधिक्षक अन्नपूर्णा सिंह व उपविभागीय पोलीस अधिकारी पूजा नागरे यांच्या मार्गदर्शनाखाली पोलीस निरीक्षक विजयसिंह राजपूत व त्यांच्या पथकाने यशस्वीरीत्या पार पाडली.

👉 “रिव्हॉल्वरचा धाक दाखवणारी टोळी पोलिसांच्या जाळ्यात; नागरिकांनी सतर्क राहण्याचे आवाहन!”