नाशिक पत्रकार हल्ला प्रकरण “संदीप काळे आक्रमक: ‘कायदा हातात घ्यायला भाग पाडू नका’”

✒️ महाराष्ट्र वाणी

नाशिक दि २० :– त्र्यंबकेश्वर (जि. नाशिक) येथे घडलेल्या पत्रकारांवरील हल्ल्यामुळे पत्रकार समाज संतप्त झाला आहे. झी २४ तासचे ब्युरो चीफ श्री. योगेश खरे, साम टीव्हीचे ब्युरो चीफ श्री. अभिजित सोनवणे आणि पुढारी न्यूजचे ब्युरो चीफ श्री. किरण ताजने यांच्यावर स्वामी समर्थ केंद्राजवळ गुंड प्रवृत्तीच्या व्यक्तींनी दगडफेक करून मारहाण केली. या हल्ल्यात किरण ताज गंभीर जखमी झाले असून, सध्या त्यांच्यावर रुग्णालयात उपचार सुरू आहेत.

या घटनेचा तीव्र निषेध व्हॉईस ऑफ मीडिया आणि V.O.M. इंटरनॅशनल फोरम तर्फे करण्यात आला. संस्थापक व आंतरराष्ट्रीय अध्यक्ष संदीप काळे यांनी मुख्यमंत्री देवेंद्र फडणवीस यांना दीर्घ पत्र पाठवून तातडीने कठोर कारवाईची मागणी केली आहे.

काळे यांनी पत्रात स्पष्ट शब्दांत म्हटले आहे की –

“आता बस झाले आहे; दोषींवर कठोर कारवाई केली नाही, तर पत्रकार समाज आणि जनतेचा रोष राज्यभर उसळेल. आम्हाला कायदा हातात घ्यायला भाग पाडू नका.”

पत्रकार हे लोकशाहीचे चौथा स्तंभ असल्याचे अधोरेखित करताना त्यांनी सांगितले की, सत्य मांडणे, जनतेच्या प्रश्नांना न्याय मिळवून देणे आणि भ्रष्टाचाराचा पर्दाफाश करणे हे पत्रकारांचे काम आहे. अशा कार्यकर्त्यांवर होणारे हल्ले केवळ पत्रकारांवर नाही, तर संपूर्ण लोकशाहीवर थेट हल्ला आहेत.

संदीप काळे यांनी मुख्यमंत्र्यांकडे पाठवलेल्या पत्रात पुढील ठाम मागण्या केल्या आहेत –

१) या घटनेतील सर्व दोषींना तातडीने अटक करून कठोर कायदेशीर कारवाई करावी.

२) राज्यातील पत्रकारांच्या सुरक्षेसाठी विशेष सुरक्षा यंत्रणा उभारावी.

३) भविष्यात अशा घटना टाळण्यासाठी ठोस, प्रभावी आणि दीर्घकालीन धोरण राबवावे.

४) प्रत्येक जिल्ह्यात पत्रकार संरक्षणासाठी विशेष सेल स्थापन करून तत्काळ मदत व तपास प्रक्रिया सुरू करावी.

पत्रकारांवर झालेल्या या हल्ल्यामुळे संपूर्ण महाराष्ट्रातील पत्रकार वर्ग संतप्त झाला आहे. संदीप काळे यांनी चेतावणी दिली आहे की, जर दोषींवर कठोर कारवाई झाली नाही, तर पत्रकार समाजासह जनतेत मोठा रोष उसळेल.

त्यांनी मुख्यमंत्र्यांना उद्देशून लिहिले –

“आपण त्वरित निर्णय घेतला, तर पत्रकारांना पुन्हा निर्भयतेने काम करण्याचा आत्मविश्वास मिळेल; अन्यथा लोकशाही व जनतेच्या विश्वासावर गंभीर परिणाम होईल.”