✨चिकलठाणा सोनसाखळी लुट प्रकरण उघडकीस: आंतरजिल्हा दरोडेखोर ‘कुलदीप पवार’ LCBच्या शिताफीनं ताब्यात!✨
Maharashtra Vaani 
महाराष्ट्र वाणी न्युज
छत्रपती संभाजीनगर(औरंगाबाद) दि ८ :- ग्रामीण स्थानिक गुन्हे शाखेच्या चमूने रस्त्यावर चालणाऱ्या महिलांना व पुरुषांना धमकावून सोन्याचे दागिने लुटणाऱ्या आरोपीला शिताफिने पकडण्यात यश मिळवले आहे.
२४ जानेवारी २०२५ रोजी सकाळी वॉकसाठी गेलेल्या विजय जगन्नाथ जैवाळ (वय ४६, रा. हरीराम नगर, बीड बायपास रोड) यांना देवळाई चौकाजवळ तीन इसमांनी मोटारसायकलवर येत गळ्यातील सोन्याचे दागिने हिसकावले होते. या प्रकरणी चिकलठाणा पोलीस ठाण्यात गुन्हा दाखल करण्यात आला होता.
मा. पोलिस अधीक्षक डॉ. विनयकुमार राठोड यांच्या मार्गदर्शनाखाली तपास सुरू असताना, पोलीस निरीक्षक विजयसिंग राजपुत (स्थानिक गुन्हे शाखा) यांना मिळालेल्या गोपनीय माहितीच्या आधारे आरोपी कुलदीप अर्जुन पवार (रा. राहेरा, ता. घनसावंगी, जि. जालना) याला अंबड येथे शिताफिने अटक करण्यात आली. चौकशीत त्याने जानेवारी महिन्यात बीड बायपासवरील बाळापुर शिवारात वॉक करणाऱ्याला लुटल्याची कबुली दिली.
तपासात उघड झाले की, कुलदीप पवार हा साखळी चोर असून त्याच्यावर चिकलठाणा, पाचोड, बीडकीन, सातारा, गोंदी (जालना), तसेच पिंपरी-चिंचवड, आळंदी, विमाननगर, विश्रांतवाडी व शिक्रापुर (पुणे) या पोलीस ठाण्यांत एकूण १४ गुन्हे दाखल आहेत. आरोपीला मुदेमालासह चिकलठाणा पोलिसांच्या ताब्यात देण्यात आले असून पुढील तपास सुरू आहे.
ही कारवाई पोलीस निरीक्षक विजयसिंग राजपुत, सपोनि पवन इंगळे, सपोनि सुधीर मोटे, अंमलदार संतोष पाटिल, वाल्मीक निकम, दत्ता मुंडे, शिवानंद बनगे, अशोक वाघ, अनिल काळे, महेश बिरुटे, सनी खरात, महिला अंमलदार सरला जाधव, कविता पवार, व चालक संजय तांदळे, योगेश तरमळे, जीवन घोलप यांनी केली.
🟢 स्थानिक गुन्हे शाखेच्या वेगवान कारवाईमुळे आणखी अनेक चोरीप्रकरणांवर पडणार पडदा!
