खुनाचा गुन्हा उघडकीस: वाळुज पोलिसांचे पराक्रमी यश! 78 वर्षीय नागरिकाच्या खुनाचा थरार उकलला; सोन्याचे दागिनेही जप्त

महाराष्ट्र वाणी न्युज 

छत्रपती संभाजीनगर(औरंगाबाद) दि ३० :- अनेक दिवसांपासून पोलिसांना आव्हान ठरलेला मौजे शेंदुरवाडा (ता. गंगापूर) येथील खुनाचा गुन्हा अखेर वाळुज पोलिसांनी उघडकीस आणला आहे. या घटनेत 78 वर्षीय वयोवृद्ध नागरिक नारायण पंढरीनाथ निकम यांचा निर्घृण खून करून जबरी चोरी करण्यात आली होती.

काय घडलं होतं?

दिनांक 26 मे 2024 रोजी शेंदुरवाडा गावातील निकम यांच्या घरात दरोडेखोरांनी घुसून त्यांच्यावर डोक्यात प्रहार करून हत्या केली. एवढंच नव्हे तर, त्यांच्या सुनबाईलाही मारहाण करून अंगावरील सोन्याचे दागिने ओरबाडून नेण्यात आले. या प्रकरणी वाळुज पोलीस स्टेशनमध्ये खुनाचा गुन्हा दाखल करण्यात आला होता.

पोलिसांसमोर उभं राहिलेलं मोठं आव्हान

या खुनाच्या तपासात वाळुज पोलिसांनी संपूर्ण परिसर पिंजून काढला. हद्दीतील गुन्हेगारांची पडताळणी करण्यात आली, तसेच मृतकाचे वैमनस्य, मालमत्तेचे वाद व चोरी या सर्व अंगांनी तपास करण्यात आला. परंतु, अनेक प्रयत्नांनंतरही आरोपी पोलिसांच्या हाती लागत नव्हते. त्यामुळे वाळुज पोलिसांसमोर मोठं आव्हान उभं राहिलं होतं.

लोणार प्रकरणातून मिळाला धागा

दरम्यान, नुकतेच बुलढाणा जिल्ह्यातील लोणार पोलीसांनी खून व जबरी चोरीप्रकरणी दोन आरोपींना अटक केली होती. हे आरोपी गंगापूर तालुक्यातील बोरुडी गायराण सावखेडा व डोमेगाव येथील रहिवासी असल्याचे समोर आले. त्यांनी लोणार भागातही एका वयोवृद्ध व्यक्तीचा खून करून त्यांची मोटारसायकल चोरली होती. ती मोटारसायकल नंतर वाळुज परिसरात सापडली. या चोरीच्या तपासातून वाळुज पोलिसांना शेंदुरवाडा खुनाचा धागा सापडला.

आरोपींची कबुली व जप्ती

आरोपींची नावे –

1. महेश कांचा काळे, रा. बोरुडी गायराण सावखेडा, ता. गंगापूर, जि. छत्रपती संभाजीनगर

2. मंजु काताराज पवार, रा. डोमेगाव, ता. गंगापूर, जि. छत्रपती संभाजीनगर

दोघांना बुलढाणा कारागृहातून ताब्यात घेण्यात आलं असून त्यांनी खुनाची कबुली दिली आहे. तसेच चोरीस गेलेले सोन्याचे दागिने पोलिसांनी जप्त केले आहेत. तपासातून हा खून चोरीच्या उद्देशाने झाल्याचे स्पष्ट झाले आहे.

पोलीस दलाचे पराक्रम

ही धडक कामगिरी पोलीस आयुक्त मा. प्रविण पवार, उप आयुक्त मा. पंकज अतुलकर, सहायक पोलीस आयुक्त मा. संजय सानप यांच्या मार्गदर्शनाखाली पार पडली. या तपासात पोलीस निरीक्षक राजेंद्र सहाणे, पोउपनि अजय शितोळे, पोह. संदिप धनेधर, पोअं. विजय पिंपळे, सुधाकर पाटील, नितीन धुळे, श्रीकांत सपकाळ, स्नेहलकुमार गवळी तसेच पोलीस मित्र अमन शेख व किशोर गाडेकर यांनी मोलाची भूमिका बजावली.

👉 वाळुज पोलिसांच्या या धाडसी कारवाईमुळे खुनाच्या गुन्ह्याचा छडा लागला असून गावकऱ्यांनी सुटकेचा निश्वास टाकला आहे.