🟣 एकाच दिवशी तीन मोठे बदल! छत्रपती संभाजीनगरमध्ये प्रशासनात मोठी उलथापालथ

Apr 3, 2026 - 02:08

🟣 एकाच दिवशी तीन मोठे बदल! छत्रपती संभाजीनगरमध्ये प्रशासनात मोठी उलथापालथ

महाराष्ट्र वाणी

छत्रपती संभाजीनगर(औरंगाबाद) दि २ :- शहराच्या प्रशासनात आज मोठी खळबळ उडाली असून एकाच दिवशी तीन महत्त्वाच्या वरिष्ठ अधिकाऱ्यांच्या बदल्याचे आदेश धडकले आहेत. या निर्णयामुळे शहरात चर्चांना उधाण आले आहे.

जिल्हाधिकारी दिलीप स्वामी यांची बदली करण्यात आली असून त्यांच्या जागी विनय गौडा हे नवे जिल्हाधिकारी म्हणून पदभार स्वीकारणार आहेत. त्यांच्या कामकाजामुळे ओळख निर्माण झालेल्या स्वामी यांच्या अचानक झालेल्या बदल्यामुळे अनेकांना धक्का बसला आहे.

त्याचबरोबर महानगरपालिकेचे आयुक्त जी. श्रीकांत यांचीही बदली करण्यात आली आहे. त्यांच्या जागी आता अमोल येडगे हे नवीन मनपा आयुक्त म्हणून कार्यभार सांभाळणार आहेत. शहर विकासाच्या अनेक प्रकल्पांच्या पार्श्वभूमीवर ही बदली महत्त्वाची मानली जात आहे.

दरम्यान, जिल्हा परिषदेचे मुख्य कार्यकारी अधिकारी (CEO) अंकित यांचीही बदली करण्यात आली असून त्यांच्या जागी श्रीमती मिन्नु पी. एम. या नवीन मुख्य कार्यकारी अधिकारी म्हणून रुजू होणार आहेत.

एकाच दिवशी जिल्हाधिकारी, मनपा आयुक्त आणि जिल्हा परिषद CEO या तिन्ही प्रमुख पदांवर बदल झाल्याने प्रशासनात मोठी हालचाल झाली आहे. शहरवासीयांकडून आश्चर्य व्यक्त केले जात असून या निर्णयामागील कारणांबाबत विविध तर्क-वितर्क लावले जात आहेत.

आता या नव्या अधिकाऱ्यांच्या नेतृत्वाखाली शहराच्या विकासाला नवी दिशा मिळणार का? हे पाहणे महत्त्वाचे ठरणार आहे!