"HSRP नंबर प्लेटसाठी अंतिम १० दिवस – १५ ऑगस्टनंतर थेट दंडाची कारवाई!"

महाराष्ट्र वाणी न्युज 

मुंबई (प्रतिनिधी) दि ४ ऑगस्ट :- महाराष्ट्र परिवहन विभागाने १ एप्रिल २०१९ पूर्वी नोंदणीकृत सर्व वाहनांवर हाय सिक्युरिटी रजिस्ट्रेशन प्लेट (HSRP) बसवणे अनिवार्य केले आहे. यासाठी दिलेली अंतिम मुदत आता १५ ऑगस्ट २०२५ पर्यंत वाढवण्यात आली असून, यानंतर कोणतीही मुदतवाढ दिली जाणार नाही, असा स्पष्ट इशारा विभागाने दिला आहे.

या आधीही मार्च, एप्रिल आणि जून २०२५ मध्ये तीन वेळा मुदतवाढ देण्यात आली होती. मात्र, यावेळी कुठलीही सवलत न देता १५ ऑगस्टनंतर थेट दंड आकारण्याचे धोरण ठरवण्यात आले आहे. HSRP नसलेल्या वाहनांवर वायुवेग पथक कारवाई करणार असून, मोटर वाहन कायद्यानुसार ₹१,००० ते ₹१०,००० पर्यंत दंड आकारला जाऊ शकतो.

का झाली मुदतवाढ?

राज्यात २.१ कोटींपेक्षा अधिक वाहनांना HSRP बसवणे आवश्यक आहे, परंतु आतापर्यंत केवळ २३ लाख वाहनांवरच ही प्रक्रिया पूर्ण झाली आहे. ऑनलाइन बुकिंगमधील तांत्रिक अडचणी, फिटमेंट सेंटरवरील मर्यादा, ग्रामीण भागातील जागरूकतेचा अभाव यामुळे ही मुदत पुन्हा वाढवण्यात आली होती. नागपूरसारख्या शहरांमध्ये सप्टेंबरपर्यंत स्लॉट्स भरलेले आहेत.

कोणासाठी बंधनकारक?

१ एप्रिल २०१९ पूर्वी नोंदणीकृत सर्व प्रकारच्या वाहनांसाठी – दुचाकी, तिनचाकी, चारचाकी, खासगी वा व्यावसायिक – HSRP प्लेट बसवणे बंधनकारक आहे. या प्लेट्समध्ये क्रोमियम होलोग्राम, लेसर-एच्च युनिक कोड आणि टॅम्पर-प्रूफ स्नॅप लॉकचा समावेश असतो. एप्रिल २०१९ नंतरच्या वाहनांवर या प्लेट्स आधीच बसवलेल्या असतात.

नोंदणी कशी करावी?

वाहनधारकांनी खालीलप्रमाणे प्रक्रिया पूर्ण करावी:

1. संकेतस्थळाला भेट द्या – www.transport.maharashtra.gov.in किंवा www.bookmyhsrp.com

2. RTO कोड निवडा

3. वाहनाचा तपशील भरा – नोंदणी क्रमांक, चेसिस, इंजिन क्रमांक व मोबाईल नंबर

4. अपॉइंटमेंट बुक करा – जवळच्या अधिकृत फिटमेंट सेंटरवर वेळ ठरवा

5. पेमेंट – दुचाकी ₹५३१, तिनचाकी ₹५००, चारचाकी ₹७४५ (GST सहित), होम डिलिव्हरीसाठी अतिरिक्त ₹१२५-₹२५०

6. दिलेल्या दिवशी कागदपत्रांसह फिटमेंटसाठी उपस्थित राहा

अपॉइंटमेंट घेतली तरी दंड?

१५ ऑगस्टपूर्वी ज्या वाहनधारकांनी अपॉइंटमेंट बुक केली आहे, पण तारीख नंतरची आहे, अशा वाहनधारकांवर दंड लागणार नाही. मात्र, अपॉइंटमेंट न घेणाऱ्यांवर थेट कारवाई होईल.