“गॅससाठी हेलपाटे थांबवा!” – जिल्हाधिकाऱ्यांचा कडक इशारा; आता सिलिंडर थेट घरपोचच

✍️ महाराष्ट्र वाणी

छत्रपती संभाजीनगर, दि.३० : जिल्ह्यात घरगुती गॅस सिलिंडरच्या वितरणात सुरू असलेल्या अडचणींवर आता प्रशासनाने कडक भूमिका घेतली आहे. ग्राहकांना एजन्सीवर फिरवण्याऐवजी कोणत्याही परिस्थितीत गॅस सिलिंडर घरपोच देणे बंधनकारक असल्याचे स्पष्ट निर्देश जिल्हाधिकारी दिलीप स्वामी यांनी दिले आहेत.

गॅस पुरवठ्याबाबत वाढत्या तक्रारींच्या पार्श्वभूमीवर जिल्हाधिकारी कार्यालयात तातडीची बैठक घेण्यात आली. यावेळी जिल्हा पुरवठा अधिकारी प्रवीण फुलारी, गॅस कंपन्यांचे प्रतिनिधी आणि जिल्ह्यातील विविध एजन्सीधारक उपस्थित होते.

बैठकीत समोर आले की, सध्या ऑनलाईन बुकिंग वाढले असूनही अनेक नागरिक थेट एजन्सीवर सिलिंडर घेण्यासाठी गर्दी करत आहेत. यावर जिल्हाधिकाऱ्यांनी स्पष्ट शब्दांत सांगितले की,

👉 “ग्राहकांनी एजन्सीकडे येऊ नये, बुकिंगनंतर घरपोचच डिलिव्हरी द्यावी.”

युद्धजन्य परिस्थितीमुळे बुकिंग वाढल्याचे कारण पुढे आले असले तरी, मार्च-एप्रिलमध्ये होणाऱ्या सरासरी पुरवठ्याइतकीच मागणी असल्याचे कंपन्यांनी सांगितले.

दरम्यान,

नवीन गॅस कनेक्शन सध्या बंद ठेवण्यात आले आहे

अनेक ग्राहकांची ई-केवायसी प्रक्रिया प्रलंबित असून ती ऑनलाईन पूर्ण करण्याचे आवाहन

वितरणावर लक्ष ठेवण्यासाठी प्रशासनाचा कर्मचारी एजन्सीवर नियुक्त

जिल्हाधिकाऱ्यांनी इशारा दिला की, पुढील २४ तासांत वितरण सुरळीत न झाल्यास कडक कायदेशीर कारवाई केली जाईल.

तसेच, काही ठिकाणी डिलिव्हरी वाहनांना अडथळे येत असल्याने पोलीस बंदोबस्त देण्याचे आदेशही देण्यात आले आहेत. गॅस वितरण करणाऱ्या वाहनांना पेट्रोलिंगद्वारे सुरक्षा देण्याचे निर्देश पोलिसांना देण्यात आले.

 एकूणच, “घरबसल्या गॅस” ही सुविधा आता कागदावर नाही, तर प्रत्यक्षात उतरवण्याचा प्रशासनाचा इशारा!

“ग्राहकांची गैरसोय थांबवण्यासाठी प्रशासन अॅक्शन मोडमध्ये; आता एजन्सी नव्हे, गॅस तुमच्या दारात!”