🚨 २४ तासांत बॅनर काढा; अन्यथा थेट गुन्हा दाखल! मनपाचा कडक इशारा

महाराष्ट्र वाणी 

छत्रपती संभाजीनगर(औरंगाबाद) दि २४ :- शहरात अनधिकृत होर्डिंग, बॅनर आणि पोस्टर लावणाऱ्यांवर आता थेट कायदेशीर कारवाईचा बडगा उगारण्यात आला आहे. छत्रपती संभाजीनगर महानगरपालिका प्रशासनाने जाहीर प्रगटन काढत स्पष्ट इशारा दिला आहे की, शहर हद्दीतील विजेचे खांब, रस्त्यांच्या कडेला, सार्वजनिक ठिकाणी तसेच धोकादायक जागांवर लावलेले सर्व अनधिकृत फलक संबंधितांनी २४ तासांच्या आत स्वतःहून काढून घ्यावेत.

निर्दिष्ट मुदतीत साहित्य न काढल्यास संबंधित व्यक्ती, संस्था, जाहिरातदार किंवा राजकीय पक्षांवर थेट फौजदारी गुन्हा दाखल करण्यात येणार आहे. यासाठी महाराष्ट्र मालमत्ता विरूपणास प्रतिबंध अधिनियम, १९९५ चे कलम ३ तसेच महाराष्ट्र महानगरपालिका अधिनियम, १९४९ चे कलम २४४ व २४५ अंतर्गत कठोर कारवाई होणार आहे.

मनपाने आणखी एक गंभीर इशारा दिला आहे—अनधिकृत होर्डिंग किंवा बॅनरमुळे कोणतीही जीवितहानी किंवा अपघात झाल्यास संबंधितांवर सदोष मनुष्यवधाचा गुन्हा दाखल करण्यात येईल.

आयुक्तांनी दिलेल्या या आदेशामुळे शहरातील राजकीय, सामाजिक आणि व्यावसायिक वर्तुळात खळबळ उडाली आहे. शहर सुशोभीकरण आणि नागरिकांच्या सुरक्षेसाठी प्रशासन आता कोणतीही तडजोड करणार नसल्याचे स्पष्ट झाले आहे.

👉 २४ तासांत निर्णय घ्या, अन्यथा कारवाई अटळ – मनपाचा स्पष्ट इशारा!