लाडकी बहिण योजनेच्या e-KYC प्रक्रियेत सुधारणा करा – खासदार इम्तियाज जलील यांची मुख्यमंत्र्यांकडे मागणी

महाराष्ट्र वाणी न्युज 

छत्रपती संभाजीनगर(औरंगाबाद) दि २४ :- “मुख्यमंत्री माझी लाडकी बहिण” योजनेच्या e-KYC प्रक्रियेत होत असलेल्या तांत्रिक अडचणी आणि महिलांना येणाऱ्या अडथळ्यांबाबत तात्काळ सुधारणा करण्याची मागणी माजी खासदार सय्यद इम्तियाज जलील यांनी राज्य सरकारकडे केली आहे. या संदर्भातील निवेदन मुख्यमंत्री आणि महिला व बालविकास मंत्री आदिती तटकरे यांना देण्यात आले असून महिलांच्या हितासाठी आवश्यक सुधारणा तातडीने कराव्यात, अशी मागणी त्यांनी केली आहे.

खासदार जलील यांनी आपल्या निवेदनात नमूद केले आहे की, सध्या e-KYC प्रक्रियेदरम्यान लाभार्थींना पती किंवा पित्याची माहिती अनिवार्यपणे भरावी लागते. मात्र विधवा, परितक्त्या आणि अविवाहित महिलांचे पती/पिता निधन झाले असल्यामुळे त्या अर्ज प्रक्रिया पूर्ण करू शकत नाहीत, ही गंभीर समस्या निर्माण झाली आहे. त्यामुळे "पती/पिता निधन" असा पर्याय उपलब्ध करून देणे किंवा मृत्यू प्रमाणपत्र अपलोड करण्याची सुविधा देणे आवश्यक आहे, असे त्यांनी स्पष्ट केले आहे.

याशिवाय, e-KYC संकेतस्थळ वारंवार डाऊन होणे, सर्व्हर क्रॅश होणे, ओटीपी न येणे, तांत्रिक त्रुटी, तसेच तांत्रिक सहाय्याचा अभाव यामुळे राज्यभरातील लाखो महिलांना प्रचंड त्रास सहन करावा लागत असल्याचे त्यांनी निदर्शनास आणले आहे. पोर्टलची सर्व्हर क्षमता वाढविणे, तांत्रिक सुधारणा करणे आणि ग्रामपातळीवर मार्गदर्शन व सहाय्य केंद्रे सुरू करणे ही सरकारची जबाबदारी असल्याचे ते म्हणाले.

तांत्रिक त्रुटींमुळे अनेक महिलांना वेळेत e-KYC पूर्ण करता येत नसल्याने अर्जांची अंतिम तारीख 30 ते 60 दिवसांनी वाढवावी, अशी ठोस मागणीही त्यांनी केली आहे.

महिलांना सन्मानाने न्याय मिळावा यासाठी ही सुधारणा आवश्यक असल्याचे सांगत खासदार जलील म्हणाले की,

> “योजनेचा उद्देश चांगला असला तरी अंमलबजावणीत अडचणी निर्माण झाल्या आहेत. शासनाने तातडीने उपाययोजना केल्यास खऱ्या अर्थाने महिलांना दिलासा मिळेल.”

खासदार जलील यांच्या या पुढाकाराचे अनेक सामाजिक संघटनांनी स्वागत केले असून राज्य सरकार आता यावर कोणता निर्णय घेते, याकडे सर्वांचे लक्ष लागले आहे.

👉 महिलांच्या हक्कांसाठीची ही मागणी किती प्रभावी ठरणार? यावर निर्णयाची प्रतीक्षा…