🏥 “स्टॅबिलायझर ओके तर सगळं ओके!” – किडनी आरोग्यावर महापौर समीर राजुरकर यांचा संदेश

महाराष्ट्र वाणी 

छत्रपती संभाजीनगर(औरंगाबाद), दि. २४ :

महापौर समीर राजुरकर यांनी किडनी दाता सत्कार समारंभात बोलताना एक भावनिक कबुली दिली. “महापौर झाल्यावर मला कोणकोणत्या विषयावर बोलावं लागेल याचा अंदाज आला असता, तर कदाचित मी हे धाडस केलं नसतं,” असे ते म्हणाले. या कार्यक्रमातून किडनी रुग्णांची मानसिकता, दात्यांची भूमिका आणि किडनी आरोग्याचे महत्त्व समजून घेण्याची संधी मिळाल्याचे त्यांनी सांगितले.

राजकारणात काम करताना मन स्थिर ठेवणे किती आवश्यक आहे, यावर भाष्य करताना त्यांनी सांगितले की, विविध विषय आणि आशय मनात येत असतात; त्यातून आवश्यक ते आत्मसात करून अनावश्यक गोष्टी बाहेर ठेवण्यासाठी मनावर नियंत्रण गरजेचे असते. “यासाठी योगसाधना आणि एकाग्रता महत्त्वाची,” असे त्यांनी नमूद केले.

याच संदर्भात त्यांनी शरीराच्या कार्यप्रणालीची तुलना ‘व्होल्टेज स्टॅबिलायझर’शी करत म्हटले, “शरीर स्थिर ठेवण्यासाठी जर एखादा स्टॅबिलायझर असेल, तर तो म्हणजे किडनी (मूत्रपिंड). स्टॅबिलायझर ओके तर सगळं ओके!” या विषयावर अधिक बोलण्याऐवजी तज्ञांकडून मार्गदर्शन घेण्याचेही त्यांनी सुचवले.

यावेळी Government Medical College & Hospital, Chhatrapati Sambhajinagar (घाटी) येथे अवयवदान व देहदान सुविधा उपलब्ध असल्याची माहिती देण्यात आली. रुग्णालयाच्या आधुनिकीकरणानंतर सामान्य नागरिकांना अनेक सुविधा माफक दरात मिळत असल्याचे सांगत नागरिकांनी या सुविधांचा लाभ घ्यावा, असे आवाहन करण्यात आले.

महापालिका केवळ प्राथमिक आरोग्य केंद्रांपुरती मर्यादित न राहता आधुनिक वैद्यकीय उपचार सुविधा वाढविण्यावर भर देणार असल्याचेही महापौरांनी स्पष्ट केले.

या कार्यक्रमाला घाटीचे अधिष्ठाता डॉ. शिवाजी सुक्रे आणि आयोजक डॉ. गणेश बर्नेला यांची प्रमुख उपस्थिती होती.

आरोग्य जागरूकतेचा संदेश देत अवयवदानाची भावना अधिक बळकट करण्याचा प्रयत्न या समारंभातून दिसून आला.