मेहरूणच्या इकरा महाविद्यालयात ‘आत्मनिर्भर युवती अभियान’ व्याख्यानमाला उत्साहात संपन्न

महाराष्ट्र वाणी 

मेहरूण (जळगाव) दि २७ :- मेहरूण येथील इकरा एच. जे. थीम कला व विज्ञान महाविद्यालयात ७ ते १३ फेब्रुवारी २०२६ दरम्यान आयोजित आत्मनिर्भर युवती अभियान व्याख्यानमाला विद्यार्थिनींसाठी मार्गदर्शक ठरली. सहा दिवस चाललेल्या या व्याख्यानमालेत विविध क्षेत्रातील तज्ज्ञांनी स्वावलंबन, आरोग्य, आर्थिक साक्षरता आणि कौशल्य विकास यांसारख्या महत्त्वाच्या विषयांवर विद्यार्थिनींना मार्गदर्शन केले.

उद्घाटन सत्रात डॉ. नयना महाजन यांनी सायबर क्राईम व सोशल मीडियाचा योग्य वापर या विषयावर माहिती देत डिजिटल जगतात सुरक्षित राहण्यासाठी आवश्यक खबरदारी सांगितली. त्यानंतर कुर्बान तडवी यांनी कृषी विभागाच्या विविध योजनांची माहिती देत शासकीय योजनांचा लाभ कसा घ्यावा याबाबत मार्गदर्शन केले. चेतन आर. पाटील यांनी बँक व्यवहार आणि बचत योजनांची माहिती देत आर्थिक साक्षरतेचे महत्त्व अधोरेखित केले.

डॉ. प्रियंका चौधरी (MBBS, MS) यांनी महिलांच्या आरोग्याबाबत सविस्तर मार्गदर्शन केले. पुढील सत्रात मसूद सर यांनी विद्यार्थिनींच्या हिमोग्लोबिन (HB) तपासणीचे महत्त्व स्पष्ट करून प्रत्यक्ष तपासणीही केली.

पल्लवी भोगे यांनी स्वयंरोजगाराच्या विविध संधींबाबत माहिती देत विद्यार्थिनींना उद्योजकतेकडे वळण्याचे आवाहन केले. तर डॉ. अंजली बोंदर यांनी नेतृत्व गुण, सॉफ्ट स्किल्स आणि विविध कलागुणांच्या विकासावर मार्गदर्शन केले.

समारोप सत्रात मुलींचे विचार व व्यक्तिमत्व विकास या विषयावर संवाद साधण्यात आला. या वेळी विद्यार्थिनींनी उत्स्फूर्त सहभाग घेत विविध प्रश्न विचारून मार्गदर्शन घेतले.

ही व्याख्यानमाला महाविद्यालयाचे प्राचार्य डॉ. वकार शेख यांच्या मार्गदर्शनाखाली पार पडली. कार्यक्रमाच्या समन्वयक म्हणून डॉ. कहकशा अंजुम यांनी नियोजन व अंमलबजावणीची जबाबदारी यशस्वीरीत्या पार पाडली. युवती सभेअंतर्गत कार्यरत महिला प्राध्यापक डॉ. अंजली कुलकर्णी, डॉ. फिरदोस शेख, डॉ. शबाना खाटिक तसेच महाविद्यालयातील सर्व महिला प्राध्यापकांनी कार्यक्रम यशस्वी करण्यासाठी विशेष परिश्रम घेतले.

या व्याख्यानमालेमुळे विद्यार्थिनींमध्ये आत्मविश्वास वाढून स्वावलंबी जीवनासाठी आवश्यक ज्ञान व प्रेरणा मिळाल्याची भावना व्यक्त करण्यात आली. महाविद्यालय प्रशासनाने सर्व मान्यवर वक्ते, सहभागी विद्यार्थिनी आणि सहकार्य करणाऱ्यांचे आभार मानले.

— “आत्मनिर्भरतेकडे वाटचाल करणाऱ्या विद्यार्थिनींसाठी ही व्याख्यानमाला प्रेरणादायी ठरली.”