मुंबई आझाद मैदान : आमदार विलास भुमरे यांची जरांगे पाटील उपोषण स्थळी हजेरी"

महाराष्ट्र वाणी न्युज 

मुंबई दि ३१ :- मराठा आरक्षणाच्या मागणीसाठी आझाद मैदानावर आमरण उपोषणास बसलेले मराठा संघर्षयोद्धा श्री. मनोजदादा जरांगे पाटील यांना आज आमदार विलास संदिपान भुमरे यांनी भेट दिली. समाजाच्या हितासाठी सुरू असलेल्या या आंदोलनाला त्यांनी थेट जाहीर पाठिंबा दर्शविला.

आमदार भुमरे यांनी आंदोलनकर्त्यांना विश्वास दिला की, त्यांच्या न्याय्य मागण्यांचा सकारात्मक पद्धतीने पाठपुरावा केला जाईल आणि शासन दरबारी समाजाच्या भावना ठामपणे मांडल्या जातील. सरकारने या प्रश्नाकडे गांभीर्याने पाहिले पाहिजे, अशी अपेक्षा त्यांनी व्यक्त केली.

संतुलित दृष्टिकोन :

मनोज जरांगे पाटील यांच्या नेतृत्वाखालील आंदोलनाला गेल्या काही दिवसांत समाजातील विविध स्तरांतून तसेच राजकीय नेत्यांकडून सातत्याने पाठिंबा मिळत आहे. परंतु, केवळ पाठिंबा देणे पुरेसे ठरणार नाही, तर ठोस उपाययोजना सरकारकडून होणे गरजेचे आहे.

राजकीय नेते एकामागून एक भेट देत असले तरी प्रत्यक्षात शासनस्तरावर निर्णय घेण्याची गती मंदावलेली दिसते. यामुळे समाजातील असंतोष वाढत असून परिस्थिती अधिक चिघळण्याची भीती व्यक्त केली जाते.

मराठा समाजाच्या आरक्षणासंदर्भातील प्रश्न सोडवण्यासाठी सत्ताधारी व विरोधक दोघांनीही एकत्रितपणे भूमिका घ्यावी, अशी अपेक्षा व्यक्त होत आहे. केवळ राजकीय आश्वासनांवर समाधान मानणे समाजाला आता मान्य नाही, असे आंदोलनस्थळी उपस्थित असलेल्या काही कार्यकर्त्यांनी नमूद केले.

भुमरे यांचा पाठिंबा आंदोलनाला निश्चितच बळ देतो, परंतु मराठा समाजाच्या खऱ्या समाधानाचा मार्ग केवळ शासन निर्णयातूनच निघणार आहे.