प्रशासक जी. श्रीकांत यांची कडक भूमिका : प्लॅस्टिक मुक्तीसाठी प्रतिबंधित प्लॅस्टिक साठवणाऱ्यांवर गुन्हे दाखल करण्याचे आदेश!

महाराष्ट्र वाणी न्युज 

छत्रपती संभाजीनगर(औरंगाबाद) दि.१७ :- शहराला पूर्णपणे प्लॅस्टिक मुक्त करण्यासाठी मनपा प्रशासनाने कडक भूमिका घेतली आहे. शहरातील दुकाने, गोदामे, ट्रान्सपोर्ट आणि इतर ठिकाणी प्रतिबंधित प्लॅस्टिक वापरणारे तसेच साठा करणाऱ्यांवर गुन्हे दाखल करण्याचे आदेश मनपा आयुक्त व प्रशासक जी. श्रीकांत यांनी दिले आहेत.

१८०० किलो प्लॅस्टिक जप्त!

१३ सप्टेंबर रोजी बाबा पेट्रोल पंप परिसरात घेतलेल्या मोठ्या कारवाईत नागरी मित्र पथकाने तब्बल १८०० किलो प्रतिबंधित प्लॅस्टिक जप्त केले. यासोबतच प्लॅस्टिक वाहून नेणारे वाहन जप्त करून ते मनपा मुख्यालयात जमा करण्यात आले. ही कारवाई उपआयुक्त तथा घनकचरा व्यवस्थापन कक्ष प्रमुख नंदकिशोर भोंबे यांच्या मार्गदर्शनाखाली झाली.

दंड व गुन्हा दाखल

आज मनपा मुख्यालयात जप्त केलेल्या मालाची पाहणी करून संबंधित व्यापारी व वाहनचालक यांच्यावर २५ हजार रुपये दंड आकारण्यात आला आहे. तसेच क्रांती चौक पोलीस ठाण्यात त्यांच्या विरोधात गुन्हा दाखल करण्याची प्रक्रिया सुरू करण्यात आली आहे.

आणखी दुकाने-गोदामे तपासणीस आदेश

याप्रसंगी आयुक्त व प्रशासक जी. श्रीकांत यांनी नागरी मित्र पथक प्रमुख प्रमोद जाधव यांना आदेश देत म्हटले की,

 “शहरातील सर्व दुकाने, गोदामे, ट्रान्सपोर्ट आदी ठिकाणी तपासणी करून प्रतिबंधित प्लॅस्टिक साठवणाऱ्यांवर कठोर कारवाई करा. गुन्हे दाखल करून प्लॅस्टिक मुक्त छत्रपती संभाजीनगर घडवा.”

उपस्थित मान्यवर

या कारवाईदरम्यान उपआयुक्त नंदकिशोर भोंबे, नागरी मित्र पथक प्रमुख प्रमोद जाधव तसेच पथकातील कर्मचारी उपस्थित होते.

👉 छत्रपती संभाजीनगरकरांनो, चला मिळून शहर प्लॅस्टिक मुक्त करूया! 🌱