पत्रकार संरक्षण कायद्याची तात्काळ अंमलबजावणी करा – ११ ऑक्टोबरला ‘एसएमएस पाठवा’ आंदोलन

महाराष्ट्र वाणी न्युज 

मुंबई, दि. ६ (प्रतिनिधी) :– महाराष्ट्रातील पत्रकार संरक्षण कायद्याची तत्काळ अंमलबजावणी व्हावी, या मागणीसाठी राज्यभरातील विविध पत्रकार संघटना एकत्र आल्या असून, २५ नोव्हेंबर २०२५ रोजी मुंबईतील आझाद मैदानावर एकदिवसीय लाक्षणिक उपोषण करण्यात येणार आहे. या मोठ्या आंदोलनाचा पहिला टप्पा म्हणून येत्या ११ ऑक्टोबर रोजी “एसएमएस पाठवा आंदोलन” राबविण्यात येणार आहे.

या दिवशी राज्यभरातील हजारो पत्रकार मुख्यमंत्री आणि दोन्ही उपमुख्यमंत्र्यांना एसएमएस पाठवून पत्रकार संरक्षण कायद्याच्या अंमलबजावणीची मागणी करणार आहेत. हे आंदोलन **‘पत्रकार अभिव्यक्ती संरक्षण मंचा’**च्या वतीने आयोजित करण्यात आले असून, राज्यातील सर्व प्रमुख पत्रकार संघटना यात सहभागी होत आहेत.

📜 २०१७ मध्ये मंजूर, पण अजून अंमलात नाही!

पत्रकार संरक्षण कायद्याचे विधेयक २०१७ मध्ये महाराष्ट्र विधानसभा आणि विधान परिषदेत संमत झाले. नोव्हेंबर २०१९ मध्ये राष्ट्रपतींची मंजुरी मिळाल्यानंतर ८ डिसेंबर २०१९ रोजी केंद्र सरकारच्या गॅझेटमध्ये तो कायदा प्रसिद्ध झाला. तरीदेखील राज्य सरकारने अद्याप त्याच्या अंमलबजावणीसाठी आवश्यक नोटिफिकेशन काढलेले नाही.

पत्रकार संघटनांनी वारंवार पाठपुरावा करूनही सरकारकडून कोणतीही ठोस कारवाई झालेली नाही. परिणामी, पत्रकारांवर होणाऱ्या हल्ल्यांमध्ये सातत्याने वाढ होत आहे. नाशिक, मुंबई, अमरावती, करमाळा यांसारख्या ठिकाणी पत्रकारांवर झालेल्या हल्ल्यांनंतरही आरोपींवर किरकोळ कारवाई होते आणि ते मोकाट फिरत आहेत, असा आरोप संघटनांनी केला आहे.

📢 एकजुटीचा आवाज — एसएमएस आंदोलनातून संतप्त भावना व्यक्त!

पत्रकार अभिव्यक्ती संरक्षण मंचाच्यावतीने करण्यात आलेल्या आवाहनानुसार, राज्यातील सर्व पत्रकारांनी ११ ऑक्टोबर रोजी मुख्यमंत्री आणि उपमुख्यमंत्र्यांना एसएमएस पाठवून आपल्या संतप्त भावना व्यक्त कराव्यात, असे आवाहन करण्यात आले आहे.

या आंदोलनाला खालील प्रमुख संघटनांचा पाठिंबा आहे 

मराठी पत्रकार परिषद, मुंबई मराठी पत्रकार संघ, मुंबई प्रेस क्लब, लोकशाही पत्रकार संघ, मंत्रालय व विधीमंडळ वार्ताहर संघ, टीव्ही जर्नालिस्ट असोसिएशन, बृहन्मुंबई यूनियन ऑफ जर्नालिस्ट, बीएमसी वार्ताहर संघ, मुंबई क्राइम रिपोर्टर असोसिएशन, पुणे पत्रकार प्रतिष्ठान, श्रमिक पत्रकार संघ, मुंबई हिंदी पत्रकार संघ, नॅशनल यूनियन ऑफ जर्नालिस्ट ऑफ इंडिया, डिजिटल मीडिया परिषद, पत्रकार हल्ला विरोधी कृती समिती आदी.

📲 पत्रकारांच्या हक्कांसाठीचा हा एकत्रित आवाज सरकारला जागं करेल, अशी पत्रकार संघटनांची अपेक्षा आहे.

✍️ महाराष्ट्र वाणी — पत्रकारांच्या हक्कांसाठी लढणाऱ्या प्रत्येक आवाजासोबत!