अल-खिदमत फाउंडेशनच्या इजतेमाई निकाह कार्यक्रमाचे यश; पदाधिकाऱ्यांचा सत्कार

महाराष्ट्र वाणी 

नगरदेवळा (प्रतिनिधी) दि १७ :- अल-खिदमत फाउंडेशनच्या वतीने नगरदेवळा येथे आयोजित करण्यात आलेला इजतेमाई निकाह कार्यक्रम अत्यंत शिस्तबद्ध व सामाजिक सलोख्याच्या वातावरणात यशस्वीरीत्या पार पडला. या उपक्रमामुळे अनेक गरजू कुटुंबांना दिलासा मिळाला असून, समाजातील एकोप्याचे दर्शन घडले.

या यशस्वी आयोजनाबद्दल CRPF उपनिरीक्षक मकसूद खान इब्राहिम खान यांच्यासह आरिफ खान, खिझर खान, राउफ भाई, कादर भाई, फैजान भाई आणि कादिर खान यांनी अल-खिदमत फाउंडेशनच्या पदाधिकाऱ्यांचा सत्कार करून त्यांचे कौतुक केले.

यावेळी अल-खिदमत फाउंडेशनचे पदाधिकारी फरीद खान, अबरार खान, सुफियान शेख, दानिश सैय्यद, अनिस बागवान, सईद मिस्त्री आणि शोएब मिर्जा यांचा शाल व पुष्पगुच्छ देऊन गौरव करण्यात आला. कार्यक्रमाचे नियोजन, व्यवस्थापन व समाजोपयोगी दृष्टिकोन याबाबत उपस्थित मान्यवरांनी विशेष प्रशंसा केली.

सत्कारप्रसंगी बोलताना मान्यवरांनी सांगितले की, इजतेमाई निकाहसारखे उपक्रम समाजातील आर्थिकदृष्ट्या दुर्बल घटकांसाठी आधार ठरतात. अशा कार्यक्रमांमुळे अनावश्यक खर्च टळतो तसेच सामाजिक जबाबदारीची जाणीव अधिक दृढ होते.

अल-खिदमत फाउंडेशनच्या पदाधिकाऱ्यांनी सत्काराबद्दल आभार मानत, पुढील काळातही समाजहितासाठी विविध उपक्रम राबविण्याचा संकल्प व्यक्त केला. कार्यक्रमास स्थानिक नागरिक, समाजसेवक व कार्यकर्त्यांची मोठ्या संख्येने उपस्थिती होती.

— समाजएकतेचा संदेश देणारे असे उपक्रमच खऱ्या अर्थाने सामाजिक परिवर्तनाची नांदी ठरतात.